Moabot sa kapin P1.5 million nga balor sa ilegal nga drugas ang nasakmit sa kapulisan sa Bohol ug Siyudad sa Sugbo atol sa Simultaneous-Anti Criminality and Law Enforcement Operation sa Miyerkules, Mayo 28, 2025.
Ang labing dako nga nasakmit mao ang gilusad nga buy-bust sa Sawang Calero Police Station alas 11:55 sa gabii, Miyerkules, Mayo 28, 2025 sa Belgium Street, Barangay Suba, Dakbayan sa Sugbo.
Ang nadakpan giila nga si Harrybert Cabras alyas Harry, 27, taga Sitio Manga, Barangay Mambaling.
Nakuha gikan kaniya ang binulto sa gituohang shabu nga motimbang sa 150.42 gramos nga dunay standard drug price nga P1,022,856 ug mga drug paraphernalia.
Wala sab magpauwahi ang Waterfront Police Station 3 nilusad sila og buy-bust sa sulod sa Doña Pepang Cemetery, Barangay Tejero, Dakbayan sa Sugbo alas 9:50 sa gabii.
Giila ang nasikop nga si Christian Babes Valencia Remulta, 21, taga Belgium Street, Barangay Suba.
Nakuha sa suspek ang mga pinakete sa shabu nga mokantidad og P20,400.
Lima ka minutos lang ang gintang ang Parian Police Station nidakop sa babaye nga drug personality human ma-buy-bust sa Sitio Riverside, Barangay Lorega.
Ang suspek mao si Jovelyn Sonit Buenavista alyas Tilang, 47, taga Sitio Silangan 1, Barangay Tinago.
Nasakmit sa mga operatiba ang mga pinutos sa shabu nga motimbang sa 10 gramos nga dunay balor nga P68,000.
OPERASYON SA BOHOL
Samtang ang mga sakop sa Provincial Intelligence Unit sa Bohol Police Provincial Office nisikop sa usa ka high value target atol sa buy-bust sa Purok 6, Barangay Poblacion, Lungsod sa Maribojoc, Lalawigan sa Bohol.
Ang suspek giila nga si Alberto Beimen Jr., alyas Junjun, 41, usa ka maintenance worker sa usa ka kompanya nga nagpuyo sa Purok 1, Barangay Guiwanon, Maribojoc.
Nakuha gikan kaniya ang binulto sa shabu nga mokantidad sa P442,000 lakip na ang usa ka .45 nga kalibre sa pistola.
Matod ni Police Lieutenant Colonel Jomar Pomarejos, hepe sa PIU sa Bohol PPO nga base sa ilang nakuha nga kasayuran, ang amo sa maong suspek naa sa sulod sa usa ka jail facility nga maoy
mo-facilitate sa supply sa illegal drugs.
Giingong makabaligya siya og 30 ngadto sa 50 gramos nga shabu matag semana diin ang iyang area sa distribution mao ang silingang mga Lungsod sa Maribojoc ug Dakbayan sa Tagbilaran.
Kalapasan sa Section 5 ug 11, Republic Act 9165 ug Comelec Gun Ban ang atubangon nga kaso ni Beimen.
Ang mga nakuhang ebedensiya giduso na sa kapulisan sa tagsa-tagsa ka PNP Forensic Unit alang sa himuon nga chemical analysis. / AYB