Mga pinayuhot nga sigarilyo nga nagkantidad og P15 milyunes nga gikarga sa usa ka canter truck ang nasakmit sa mga sakop sa Negros Oriental Police Provincial Office (Norpo) ug sa Police Regional Office Negros Island Region (PRO NIR) sa pantalan sa Barangay Looc, Siyudad sa Dumaguete, Miyerkules sa gabii, Agusto 5, 2026.
Atol sa maong operation, nadakpan ang driver sa canter truck nga si alyas Je, 32, taga Barangay Tuburan, Pagadian City, Zamboanga del Sur.
Apil sa gikustodiya sa kapulisan ang duha ka sakay niini nga silang alyas Jo, 22, taga Barangay Bulatok, Pagadian City; ug alyas Al, 27, taga Barangay Alulayag-layag, Parang, Probinsiya sa Sulu.
Unang nakadawat og report ang kapulisan sa Norpo nga dunay moabot nga pinayuhot nga sigarilyo agi sa pantalan sa Dumaguete nga gikan sa Pagadian.
Nakig-alayon dayon ang Norpo sa PRO NIR, Philippine Coast Guard, K9 Unit, Special Operation Unit, Bureau of Customs Sub-port of Dumaguete, ug ubang tinugyanan sa balaod.
Pag-abot sa barko gikan sa Pagadian, gisusi dayon ang mga karga sa mga dagkong sakyanan ug malampuson nila nga na-intercept ang truck nga gikargahan sa ilegal nga sigarilyo.
Nasakmit sa mga operatiba ang 68 ka master cases sa Walter Premium Cigarettes, 195 ka master cases sa Busqu Full Flavor Cigarettes; giapil sab ang 200 ka kahon sa buwad nga “tamban” nga gibana-bana nga mokantidad sa P90,000 ug ang canter truck nga gisakyan niini nga mobalor ang tanan sa P15,069,900.
Ang tulo ka mga suspek kasamtangan nga gikustodiya sa Dumaguete City Police Station.
Kasong kalapasan sa Republic Act 10863 kun ang An Act Modernizing the Custom and Tariff Administration ang ipasaka batok kanila. / AYB
