P16.3M nga shabu, 6 ka mga ‘durugista’

P16.3M nga shabu, 6 ka mga ‘durugista’
SunStar Local News GPX

Sulod lang sa usa ka adlaw, ang Police Regional Office 7 nakasakmit og kapin sa duha ka kilo nga gituohang shabu nga dunay standard drug price nga P16.3 million sa managlahi nga anti-illegal drug operations sa Pebrero 8, 2024.

Atol sa subsub nga operation, nakasikop ang kapulisan og unom ka drug personalities sa siyudad sa Mandaue, Talisay, Naga ug dakbayan sa Sugbo.

Sa nadawat nga progress report sa PRO 7, duha ka drug suspects ang nadakpan sa dakbayan sa Talisay nga nakuhaan og 600 gramos sa gituohang shabu nga mokantidad og P4,080,000 ug usa ka 9MM pistol sa San Rafael, Barangay Tanke alas 7:59 sa Huwebes sa gabii.

Sa siyudad sa Naga, ang Naga City Police Station nakasikop sa usa ka alyas “Emoy” nga nakuhaan og 350 gramos nga gituohang shabu nga dunay balor nga P2,380,00 alas 10:25 sa gabii sa samang petsa.

Pagka alas 10:38 sa gabii, ang City Drug Enforcement Unit sa Mandaue City Police Office (MCPO) nakasikop og laing drug personality nga si alyas “Mitch” nga giila nga high value individual sa North Reclamation Area sa Brgy. Subangdaku.

Nakuha gikan sa suspek ang 100 gramos sa gituohang shabu nga dunay SDP nga P680,000, lakip na ang mga drug paraphernalia.

Samtang moabot usab sa 1,025 gramos nga shabu nga mokantidad og P6,970,000 ug ubang mga ebidensya nasakmit sa MCPO gikan kang alyas Roger atol sa buy bust sa City Intelligence Unit, inabagan sa Regional Police Drug Enforcement Unit ug Police Station 4 sa ML. Quezon St., Brgy. Maguikay alas 12:12 sa Biyernes sa kaadlawon, Pebrero 9, 2024.

Ang mga operatiba nagpatuo nga mga bayot pinaagi sa ilang pagsul-ob og duster sa mga babaye aron dili mailhan ni Roger.

Samtang ang City Drug Enforcement Unit sa Cebu City Police Office (CCPO) nakasikop usab sa 34 anyos nga high profile drug suspect alas 12:55 sa Biyernes sa hapon.

Ang CCPO naka kuha og mga binulto sa gituohang shabu nga motimbang og 325 gramos nga dunay SDP nga P2,210,000 lakip na ang buy bust money ug bag nga gisudlan niini.

Tungod niini, ang hepe sa kapulisan sa Central Visayas, Police Brigadier General Anthony Aberin, nakadayeg sa iyang mga sakop nga nagkugi sa ilang trabaho aron magpabilin nga luwas ug malinawon ang tibuok rehiyon 7 subay sa sub-sub nga anti-illegal drug operations.

Ang mga suspek mag-atubang og kaso ngadto sa korte sa paglapas sa Section 5 ug 11, Article II sa Republic Act 9165 kun Comprehensive Dangerous Drugs Act of 2002.

Nimando pa si Aberin sa tanang city ug provincial police office directors sa pagpadayon sa ilang nasugdan na nga kampanya ug puhagon ang nagpabiling drug personalities sa ilang lugar.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph