P1.6M nakolekta sa Cebu City gikan sa Night Market, Chibugan

DAGHANG TAWO: Ang Chibugan sa Kamagayan sa Junquera St., Brgy. Kamagayan, dakbayan sa Sugbo, gidumog sa daghang tawo matag gabii nga gidumala sa Cebu Coalition of United Vendors (CCUVA). / SunStar File
DAGHANG TAWO: Ang Chibugan sa Kamagayan sa Junquera St., Brgy. Kamagayan, dakbayan sa Sugbo, gidumog sa daghang tawo matag gabii nga gidumala sa Cebu Coalition of United Vendors (CCUVA). / SunStar File

Nakakolekta ang Cebu City Government og kantidad nga P1.6 milyunes gikan sa arkabala o cash ticket sa Night Market ug Chibugan sa Kamagayan.

Sa press conference niadtong Biyernes, Disyembre 8, 2023, si Cebu City Treasurer Mare Vae Reyes niingon nga ang kinatibuk-ang koleksyon gikan sa Nobiyembre 2022 hangtod sa Nobiyembre 2023.

Si Reyes niingon nga ang arkabala gikolekta kada gabii ug kada stall, nga nag-ingon nga ang kantidad managlahi usab base sa gidak-on sa mga stall sa vendors.

“Ang koleksyon nagdepende sa gidak-on sa stall, sa akong hunahuna P20, P30 hangtod P50,” matod ni Re­yes.

Dugang pa niya nga ang ko­leksyon gi-remit sa City Trea­surer Office matag adlaw.

Sa pangutana kon pila ang ilang koleksyon matag gabii, siya miingon nga sa night market pa lang, makakolekta sila og labing minos P262,000 base sa ilang datos.

Sa samang press confe­rence niadtong Biyernes, si Maria Pino, presidente sa Cebu Coalition of Uni­ted Vendors (CCUVA) ug chairperson sa Garbo Asenso Sumbanan Al­yansa (Gasa), niingon nga ang night market modagan lang sulod sa tulo ka buwan matag tuig sugod sa tunga-tunga sa Nobiyembre hangtod sa Enero, samtang ang Chibugan sa Kamagayan anaa sa tibuok tuig.

Matod ni Raquel Arce, pangu sa Cebu City Transportation Office (CCTO), nga nagsugod ang Chibugan sa Kamagayan niadtong Hunyo ning tuiga nga gikan sa dan B. Rodriguez ang mga vendor nga nag-okupar sa luna.

Giklaro ni Reyes nga ang arkabala magamit usab sa Chibugan sa Kamagayan, nga kon walay operasyon sa night market, mangolekta sila og cash ticket gikan sa Chibugan.

Sa pangutana kon pila ka vendors ang nagnegosyo sa night market, si Pino niingon niadtong Nobiyembre, aduna nay kapin sa 300 ang stalls, samtang karong Disyembre niabot na og dul-an sa 500 ka stalls.

Dugang pa niya nga ang Disyembre mao ang peak season, samtang sa umaabot nga Enero, hinayhinay nga mokunhod ang gidaghanon sa mga vendor.

Sa miaging pakighinabi, si Pino niingon nga nakakolekta sila og P60,000 ngadto sa P80,000 matag gabii, gikan sa mga operasyon pinaagi sa P200 nga kontribusyon nga ilang nakolekta gikan sa mga partisipante nga vendors.

Ang Colon Night Market, nga gikan sa eskina sa P. del Rosario St. hangtod sa tibuok Colon St., nagsugod sa pag-o­perate niadtong Oktubre 2023 ug matapos sa Enero 2024.

Matod ni Pino, ang night market nahimutang sa upat ka barangay sa dakbayan sa Sugbo nga mao ang Sto. Niño, Kalubihan, Parian, ug Kamagayan.

Sa dihang gipangutana kon duna ba silay gipanghatag nga bahin sa maong mga barangay, siya miingon nga pipila niini nga mga barangay, sama sa Sto. Niño, nangolekta og kaugalingong cash ticket gikan sa mga vendor, apan wala ibutyag kon pila ang kantidad nga ilang gikinahanglan.

Matod niya, ang barangay Sto. Niño nangolekta og cash ticket gikan sa mga vendor kay gikinahanglan man kini ubos sa ilang barangay ordinance.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph