Kapin sa P1.7 bilyunes nga Health Emergency Allowance (HEA) ang nagpabiling wala makobra sa healthcare ug non-healthcare workers sa Central Visayas alang sa ilang serbisyo atol sa Covid-19 pandemic.
Ang Department of Health - Central Visayas Center for Health Development (DOH-CVCHD) 7 nagpagawas sa ilang unang update alang sa fiscal year 2025 niadtong Marso 10, 2025, pinaagi sa Regional Circular 2025-0029 (1), nga nagdetalye sa outstanding payments.
Ang maong impormasyon gipahibalo pinaagi sa ilang Facebook page niadtong Marso 21, nga gipirmahan ni DOH 7 Director Jaime Bernadas niadtong Marso 18.
Ang HEA, nga gimando ubos sa Republic Act (RA) 11712 o Public Health Emergency Benefits and Allowance for Health Care Workers Act, gituyo alang sa mga kwalipikado nga mga trabahante sa publiko ug pribadong sektor nga nagserbisyo panahon sa Covid-19 pandemic.
Human gilibkas ni Presidente Ferdinand Marcos Jr. ang State of Public Health Emergency niadtong Hulyo 21, 2023 ug gideklara sa World Health Organization (WHO) niadtong Mayo 5, 2023 nga ang Covid-19 dili na matawag nga global emergency, ang outstanding allowances sa mga trabahante nagpabilin nga gikabalak-an.
Ang wala mabayri nga mga kobrahonon nga mokabat sa P1,706,707,250.25, nagrepresentar sa 2,941 ka mga aprobado nga binuwan nga claims gikan sa 173 ka health facilities gikan sa Hulyo 1, 2021, hangtud sa Hulyo 20, 2023.
Ang wala mabayri nga claims mao ang mosunod:
• Hulyo 1, 2021, hangtod Disyembre 31, 2021: P590,573,625.00 (145 ka pasilidad, 132,235 ka claims)
• Enero 1, 2022, hangtod Hunyo 30, 2022: P84,393,031.50 (54 ka pasilidad, 19,305 ka claims)
• Hulyo 1, 2022, hangtod Disyembre 31, 2022: P491,932,562.50 (141 ka pasilidad, 108,084 ka claims)
• Enero 1, 2023, hangtod Hulyo 20, 2023: P539,808,031.25 (142 ka pasilidad, 117,467 ka claims)
Ang DOH-CVCHD 7 nagpahinumdum sa health facilities nga adunay pending nga claims sa pag-sumite sa tanang gikinahanglan nga mga dokumento aron mapadali ang proseso.
Ang 2024 Memorandum of Agreement (MOA) para sa HEA nagpabiling balido alang sa mga disbursement karong tuiga ug sa umaabot, depende sa available nga pundo.
Nasuta nga ang DOH-CVCHD 7 wala pa makadawat og dugang pondo gikan sa DOH Central Office (DOH-CO) sukad sa Marso 10, 2025 aron husayon kining outstanding claims.
Ang DOH-CO kasamtangang nakigtambayayong sa Department of Budget and Management (DBM) aron makuha ang gikinahanglang pundo.
Ang pag-release sa mga pundo ipaagi sa first-come, first-served basis, diin unahon kadtong unang nakakompleto sa pagsumite sa mga dokumento.
Pinaagi sa DOH Regional Circular 2025-0029(1), gidasig ang healthcare workers nga kontakon si Ms. Jasper Joy D. Luceno sa Covid-19 Health Care Worker Benefits Team alang sa dugang katin-awan mahitungod sa ilang health emergency allowance. /CDF