BUY-BUST, KINILO: Sila si Ryan Sususco Balansag, alyas “Insek”, 32, ug Marlon Jabonero Lopez, 42, nakuhaan og duha ka kilo sa gituohang shabu. / TAMPO SA CCPO
BUY-BUST, KINILO: Sila si Ryan Sususco Balansag, alyas “Insek”, 32, ug Marlon Jabonero Lopez, 42, nakuhaan og duha ka kilo sa gituohang shabu. / TAMPO SA CCPO

P17.2M shabu nakuha sa CCPO sa 1 ka gabii

Moabot og P17.2 million nga balor sa ilegal nga drugas ang nasakmit sa kapulisan sa dakbayan sa Sugbo sa ilang manag lahi nga Simultaneous Anti-Criminality and Law Enforcement Ope­ration (Sacleo) sa usa ka gabii lang.

Ang labing dako nasakmit sa City Intelligence Unit diin sila nakakuha og duha ka kilo sa gituohang shabu nga dunay standard drug price nga P13,600,000.

Gisundan kini sa Mambaling Police Station nga nakakuha og 508 gramos nga balor og P3,454,400.

Alas 9:40 sa Martes sa gabii, Marso 12, 2024, ang mga sakop sa CIU sa CCPO sa pagpangulo ni Police Lieutenant Lyndon Mondragon, ubos sa supervision ni Police Colonel Ireneo Dalogdog, hepe sa kapulisan sa Dakbayan sa Sugbo, nakasikop sa duha ka mga high value individual sa Purok 8, Barangay Kamputhaw.

Ang mga suspek nga giilang sila si Ryan Sususco Balansag, alyas “Insek”, 32, ug Marlon Jabonero Lopez, 42, mga lumolupyo sa dapit, nasakmitan og duha ka kilo sa gituohang shabu.

Pagka ala 1:15 sa Miyerkules sa kaadlawon, Marso 13, laing usa sa mga drug personality sa Sityo Puntod, Mambaling nasikop sa buy-bust operation sa Mambaling Police Station.

Ang suspek giila sa barangay officials nga si Joel Laogico Ocarol Jr., alyas Ondong, 22, taga sitio Concepcion, Barangay Pasil, dakbayan sa Sugbo.


Siya nasakmitan og 508 gramos nga shabu nga dunay standard drug price nga P3,454,400 lakip na ang buy-bust money.

Matod ni Police Major Jonathan Beethoven Taneo, hepe sa Mambaling Police station, nga ang suspek gisugo lang, matod pa, sa usa ka drug personality nga naa sa sulod sa Cebu City Jail ug suholan lang og P10,000.

Giingong makabaligya kini og tunga sa kilo ngadto sa usa ka kilo matag semana ang suspek. Siya ang mobahin niini ug magpaabot lang siya sa mando sa iyang amo.

Ang iyang area nga hagbungan mao ang Ermita, Duljo ug Mambaling, lakip na ang mga silingang mga barangay.

TALISAY CITY

Nasikop usab ang usa ka HIV sa buy-bust sa mga sakop sa Talisay City Police Drugs Enforcement Unit Intelligence Police ubos sa kamanduan sa ilang hepe nga si Police Lt. Colonel Wayne Magbanua ug ubos sa koordinasyon tali sa Philippine Drug Enforcement Agency (PDEA7).

Ang buy-bust gipahigayon sa Purok Saging, Brgy. Lawaan II, Siyudad sa Talisay, alas 10:09 sa gabii sa Marso 12, 2024.

Ang suspek giilang si Jose Marito Cabreros Labra, 27, ulitawo, taga Brgy. Inayawan, Siyudad sa Sugbo, apan nagpuyo na sa Brgy. Lawaan II, Talisay.

Sa ilang buy-bust, ang kapulisan nigamit og peke nga kwarta nga gipaibabwan og tinuod nga P500.

Nasakmit gikan kang Labra ang 25 gramos sa shabu nga dunay balor nga P170,000. / dugang taho ni DVG

Related Stories

No stories found.
SunStar Publishing Inc.
www.sunstar.com.ph