Dul-an sa tulo ka kilo sa gituohang shabu nga dunay standard drug price nga P17.8 milyunes ang nasakmit sa Police Regional Office (PRO 7) sulod sa duha ka adlaw nga Simultaneous Anti-Criminality Law Enforcement Operation (Sacleo) gikan sa Hulyo 5-7, 2024.
Atol sa maong mga adlaw, nakasikop ang kapulisan sa Central Visayas og 174 ka drug personalities.
Sa kampanya sa ilegal nga sugal, nakasikop og 213 ka mga sugarol sa 121 ka anti-illegal gambling ug pagkasakmit sa P21,790 isip sugal.
Gihingusgan sab sa PRO 7 ang ilang kampanya batok loose firearms diin nakaimbargo sila og 101 ka nagkalainlaing kalibre sa armas ug tulo ka eksplosibo nga way lisensya ug pagkasikop sa 12 ka suspek atol sa 104 ka operations.
Wa magpaulahi ang paggukod sa mga labing pinangita sa balaod diin nakadakop sila og 128 ka wanted persons, 11 niini giila nga most wanted persons nga dunay mga pending warrant of arrest. / AYB