Nakakaplag na sab ang mga mananagat sa Pangasinan og gibanabanang P1.7 bilyon nga balor sa methamphetamine hydrochloride (shabu) sa kadagatan ning bag-uhay lang.
Sa usa ka pamahayag, ang Philippine Coast Guard (PCG) niingon nga ang mga mananagat gikan sa Barangay Balingasay, Agno, Pangasinan ang unang nakakuha og duha ka mga sako nga dunay sulod nga gituohang shabu nga giputos sa vacuum-sealed nga plastik, mga 32 nautical miles sa kasadpan sa lungsod sa Agno.
Nakakita sab ang mga mananagat og upat ka mga sako sa gituohang ilegal nga kontrabando sa kadagatan sa Barangay Guiguiwanen, Bolinao; sa Cabana Resort sa Bani; ug sa Sabangan Boboy, Agno — tanan sa probinsya sa Pangasinan.
Human sa ilang mga kalihukan sa panagat, gitugyan sa mga mananagat ang ilegal nga droga ngadto sa PCG, nga nangayo og tabang sa Philippine Drug Enforcement Agency (PDEA).
Gimandoan ni Coast Guard District Northwestern Luzon Commander, Captain Mark Larsen Mariano ang tanang PCG station ug substation nga pahugtan ang coastal security patrol ug palig-unon ang community engagement sa lokal nga mga mananagat aron mapauswag ang maritime surveillance ug maseguro ang daling pagtaho sa susama nga mga insidente.
“The PCG encourages local fishermen and other maritime stakeholders to report any suspicious floating packages or activities to the nearest Coast Guard station for appropriate action,” pamahayag sa PCG.
Niadtong Hunyo 2, nakakita sab ang mga mananagat og P1.5 bilyon nga kantidad sa gituohang shabu sa kadagatan sa Zambales.
Gisulod usab kini sa vacuum-sealed nga plastik nga gibutang sulod sa mga sako. / TPM / SunStar Philippines