Giaprobahan ni Cebu Governor Pamela Baricuatro ang P1.7 milyunes nga hinabang nga kwarta alang sa 248 ka mga pamilya nga naapektuhan sa sunog nga nahitabo niadtong Hunyo 25, 2025 sa Sitio Mananga II, Barangay Tabunok, Talisay City.
Sa Facebook post sa Probinsiya sa Sugbo, si Provincial Social Welfare and Development Office (PSWDO) Assistant Department Head Marirose Lopez niingon nga 140 ka pamilya nga hingpit nga naugdaw ang ilang mga panimalay diin makadawat sila og P10,000; samtang tag P6,000 usab ang dawaton ngadto sa 16 ka pamilya nga nakan-an sa kayo ang mga balay; ug tag P3,000 alang ngadto sa 92 nga mga nag-abang ug sharers.
Si Talisay City Mayor Samsam Gullas mao ang nangayo og pinansyal nga suporta gikan sa Cebu Provincial Government Office niadtong Hulyo 3 alang sa mga nasunogan.
Giaprobahan usab dayon kini ni Gobernador Baricuatro sa samang adlaw ug nibisita sa evacuation site aron makita ang sitwasyon sa mga biktima sa nasunogan.
Emosyonal si Baricuatro sa iyang pagsaksi sa lisod nga kahimtang sa mga survivor atol sa iyang pagbisita.
Gani nipasalig kini sa mga biktima nga ang Kapitolyo mohatag og materyal ug moral nga suporta ngadto kanila.
“Naa mi diri ni Mayor Samsam aron paghatag og ginagmay’ng hinabang sa among makaya karon, ug mohatag sad mi ninyo og moral support sa nahitabo ninyo diri sa Talisay,” matod niini.
Milungtad og dul-an sa duha ka oras ang maong sunog nga niugdaw og mga panimalay ug katigayonan nga miresulta sa P2.55 milyunes nga danyos sa mga kabtangan, base sa imbestigasyon sa mga kabomberohan.
Temporaryo nga gipahimutang ang mga pamilya nga biktima sa sunog sa Barangay Tabunok Gymnasium sa maong dakbayan.
Ang sunog gikatahong nagsugod sa Sitio Jacinto ug paspas nga nikatap sa silingang kabalayan tungod kay kasagaran ginama sa light materials.
Samtang giproseso ang tabang pinansyal, gisiguro sa PSWDO ang pag-apod-apod sa mga relief goods. / Divine Grace Bendanillo, CNU Intern