Kapin P1.8 milyones nga kantidad sa gituohang shabu ang nasakmit, samtang unom ka mga indibidwal ang nasikop sa gihimong anti-illegal drug operation sa managlahing lugar sa Sugbo sa Sabado, Agusto 2, 2025.
Unang nasikop ang usa ka drug den maintainer, iyang batabata ug duha ka customers sa gihimong ronda sa Philippine Drug Enforcement Agency (PDEA 7) - Regional Special Enforcement Team-Mandaue City Office, inabagan sa Labangon Police Station sa alas 4:15 sa hapon sa Sitio Sto. Niño, Barangay Labangon, Siyudad sa Sugbo.
Ang nadakpan giila ni PDEA 7 Regional Director Joel Plaza nga si alyas Jay-R, 42, ang drug den maintainer, uban sa iyang batabata nga si alyas Dodong, 43.
Nadakpan usab silang alyas Wendel, 19, Grade 11 student ug alyas Ariel usa ka pedicab driver, nga naatlang naghingos sa ginadiling drugas.
Nasakmit sa mga tinugyanan sa balaod ang 20 ka mga pinutos sa gituohang shabu nga motimbang og 15 gramos nga dunay estimated average market value nga P102,000 ug mga drug paraphernalia.
Ang nakuhang mga ebidensya giduso na sa PDEA Regional Office Laboratory alang sa himuon nga chemical analysis.
Pagka-alas 8:20 sa gabii sa Barangay Malabago, Lungsod sa Badian, nasikop usab ang duha ka giingong high value individual sa mga sakop sa Badian Police Station, inabagan sa PDEA 7, human nakuhaan sa gituohang shabu nga motimbang og 255 gramos nga nagkantidad og kapin P1.7 milyones.
Ang mga dinakpan, nga naa sa watch list sa kapulisan, nailhan nga si alyas Randy, 51, ug ang iyang kakunsabo nga si alyas Tata, 50, pulos mga minyo ug walay mga trabaho.
Gikataho nga ang duha ka mga dinakpan pulos mga ex-convict tungod sa kalambigitan sa ilegal nga drugas.
Si Police Captain Jerwin Mark Battung, hepe sa kapulisan sa Lungsod sa Badian, nisaysay nga mahinungdanon usab ang kooperasyon sa kumunidad sa pakigbatok sa mga ilegal nga kalihukan sa maong lungsod.
“We owe this success not only to intelligence work but to the trust and cooperation of the community. As your police force, we remain committed to protecting every family in Badian from the dangers of illegal drugs. This is our duty, and we will continue to fulfill it without fear or favor.” asoy ni Battung. / JDG
