P18M danyos sa 2 ka sunog

SunStar Cebu Province map
SunStar Cebu Province map

Duha ka mga sunog ang ning-ulbo sa managlahing mga dapit sa Metro Cebu sa Miyerkules, Mayo 15, 2024.

Unang insidente nahitabo alas 5:45 sa hapon sa usa ka bodega nga dunay sulod nga mga plastik sa District 1, Brgy. Pulpogan, lungsod sa Consolacion.

Dili mominos sa P17.5 milyunes ang danyos sa maong sunog ug usa ka empleyado nga giila nga si Tony Robero, 21, naangol.

Matod ni Fire Officer 2 Jaypee Ango, fire investigator sa Consolacion Fire Station, nga si Mark Anthony Dy maoy tag-iya sa 1-storey warehouse building nga nahimutangan sa Marscel Manufacturing Corp.

Alas 6:46 sa gabii nakontrolar ang kayo ug alas 8:06 sa gabii hingpit nga napalong.

Padayon pa ang imbestigasyon sa kabumberohan aron masayran kon unsa ang hinungdan sa sunog.

Sa pagka alas 10:27 sa gabii, laing sunog niigo sa Villagonzalo 2, Barangay Tejero, dakbayan sa Sugbo, diin duha ka mga panimalay ang nangasunog.

Ang kayo hingpit nga napalong alas 10:54 sa gabii ug gibana-bana ang danyos nga P696,000.

Ang insidente maoy hinungdan sa pagpabakwit sa 113 ka mga tawo.

Tulo ka mga tawo ang nangasamdan sa sunog nga giila nga sila si Glenn Paul Rubio, kinsa adunay samad sa tuo nga kamot; Cherry Abaquita, kinsa mibati og kasakit sa ubos sa iyang buko-buko; ug Anna Mae Rebosura, kinsa nakaangkon og abrasion sa iyang tuo nga kamot.

Si Fire Officer 2 Marie Grace Ambayan niingon nga nagpadayon pa ang ilang imbestigasyon sa pagsuta sa hinungdan sa sunog. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph