Usa ka katabang gipadakop sa iyang agawon human naaktuhan nga gipangsulod sa bag ang mga alahas niini nga mobalor og dili mominos P1 million pasado alas 12:00 sa tungang gabii sa Dominggo, Nobiyembre 5, 2023.
Ang suspek giila nga si Jovelyn Nuez, 29, dalaga, taga Purok 7, Sto. Niño, lungsod sa Talibon, lalawigan sa Bohol.
Gibilanggo sa Talamban Police Station ang suspek human gipadakop sa iyang amo, kinsang ngan ug address gipapugngan sa kapulisan.
Nagtuo ang kapulisan nga modus sa suspek ang pagsulod isip katabang apan manguha og mahalon nga butang sa iyang gitrabahoan.
Kaso nga theft ang ipasaka sa kapulisan batok kaniya. Hinuon, nabawi ang tanang mga butang nga iyang gikuha kay nabantayan dayon sa iyang amo.
Ang kapulisan niawhag sa publiko nga dili basta-basta modawat og katabang kon dili makuha ang background niini.