Moabot sa P1,077,000 pa ang bayranan sa kagamhanan sa Dakbayan sa Mandaue sa pag-angkat niini og sinakong bugas ubos sa Sugbo Merkado Barato (SMB) program sa 2023.
Kini subay sa giluwatan nga dokumento ni Atty. Roy Salubre, Provincial Treasurer sa Martes, Agusto 5, 2025.
Lakip sab sa wala pa makaremit sa bayad ang Lungsod sa Argao nga moabot sa P27,600, Tuburan P27,320, Borbon P22,580, Boljoon nga may bayranan nga P2,400, ug Oslob P2,360.
Subay sa talaan sa Provincial Social Welfare and Development Office (PSWDO) moabot sa 1,198 ka sako ang giangkat sa Mandaue para sa 4,137 ka mga benepisyaryo niini.
Hinuon nakabayad na og moabot sa P121,000 ang Mandaue sa kinatibuk-ang P1, 198,000 nga bayrunon niini.
Gipasabot ni Salubre nga bukas ang buhatan nga modawat sa ilang bayad ug kinahanglan lang nga dad-on ang mga rekisitos sama sa mga resibo.
Si Roldan Saragena, hepe sa Provincial Agriculture Office (PAO), nipasabot nga ubos sa milabay nga administrasyon, ang SMB program naglakip sa distribution sa NFA rice nga gibaligya og tag P20/kilo.
Ang maka-avail niini kadtong nalakip sa listahan sa Department of Social Welfare and Development (DSWD) sa mga kabus ug labing nagkinahanglan.
Sukad sa paglusad sa programa sa Nobiyembre 2023, gihatagan og kahigayunan ang mga kwalipikadong residente sa Sugbo nga makapalit og taglima ka kilo sa bugas matag semana.
Apan tungod kay sa maong higayon nagkuwang ang supply sa NFA rice, gipaubsan ang kantidad nga mahimong mapalit ngadto sa duha na lang ka kilo matag semana.
Si Marirose Lopez, Officer-in-Charge sa Provincial Social Welfare and Development Office (PSWDO), nipahibalo nga sa maong tuig, 51 ka mga lokalidad sa probinsiya ang niangkat og bugas.
Iyang gidugang nga moabot sa 10,000 ka sako sa NFA rice ang gipalit sa probinsiya nga maoy gi-distribute sa mga kalungsoran.
Ning uwahi, nasayran nga adunay 397 ka mga sinakong bugas ang nakaplagang natambak sulod sa usa ka storage facility sa Barangay Tawason, Dakbayan sa Mandaue.
Sa kasamtangan nagpadayon pa usab ang pagsusi sa kapitolyo sa paagi sa pagpatuman sa maong programa ubos sa bag-ong administrasyon. / ANV