Niingon si Presidente Ferdinand Marcos Jr. niadtong Lunes, Hulyo 28, 2025, nga ang programa sa P20 matag kilo nga bugas gikatakdang palapdan sa tanang bahin sa nasod.
Matod ni Marcos nga sa milabayng mga bulan, napamatud-an na sa gobiyerno nga posible ang pagpaubos sa presyo sa bugas ngadto sa P20 matag kilo nga dili mag-antos ang mga mag-uuma.
Sa pagkakaron, ang P20 matag kilo nga bugas anaa sa pipila ka Kadiwa ng Pangulo Centers sa Metro Manila, Pangasinan, Cavite, Occidental Mindoro, Cebu, Bacolod, Guimaras, Siquijor, ug Davao del Sur, apan limitado lang sa mga huyang nga indibiduwal sama sa mga senior citizen, solo parents, persons with disabilities, ug mga miyembro sa Pantawid Pamilyang Pilipino Program (4Ps).
Tumong sa gobiyerno pinaagi sa Department of Agriculture (DA) nga mahimong maabot sa tanang minimum wage earners sa tibuok nasod ang P20 matag kilo nga bugas.
Niingon siya nga ang national government mogahin og P13 bilyunes aron mapalig-on sa DA ang maong programa.
“Binabalaan ko ang mga trader na magtatangkang mag-manipula ng presyo ng palay at bigas, o manloloko ng mga magsasaka. Hahabulin namin kayo, dahil ang ginagawa ninyo ay economic sabotage,” ingon niya.
Kabahin sa mga saad sa kampanya ni Marcos gawas sa pagpaubos sa presyo sa bugas ngadto sa P20 matag kilo, mao ang pagpalambo sa supply chain sa nasod aron makab-ot ang food self-sufficiency.
Pulong ni Marcos nga padayon ang paghatag og solusyon sa gobiyerno aron mapaubos ang presyo sa karne ug ubang produktong agrikultural sama sa mais, saging, pinya, mangga, kape, kakaw, calamansi, tubo, sibuyas, ug ahos.
“Mula nagsimula itong administrasyon, mahigit walo at kalahating milyong magsasaka at mangingisda ang nakatanggap ng tulong. Lalo pa natin paiigtingin ang mga programa ng pamahalaan para mas marami pa ang matutulungan. Libo-libong kilometro ng farm-to-market road na ang ginawa na, at libo-libong kilometro pa ang pinapasinayaan. Libo-libong ektarya ng lupa ay nalagyan na ng patubig sa buong bansa. At libo-libong ektarya pa ang patutubigan,” pulong sa presidente.
“Libo-libo ring makinarya at pasilidad ang ating binuksan at pinamigay para sa mga magsasaka at mangingisda. Marami po tayong ipapatayo na Rice Processing System. Itong mga pasilidad at mga bangkang yari sa fiberglass na ipapamigay naman sa mga mangingisda. Lahat ng ito ay sumusuporta sa kanila mula paghahanda, sa pagpunla, pag-ani, pagbiyahe, hanggang sa pagbenta,” dugang niya.
“Mula ngayong taon, hindi bababa sa labing-limang milyong hybrid at mataas na klaseng mga binhi ng niyog ang ating itatanim sa iba’t-ibang panig ng Pilipinas. At itutuloy natin ito hanggang isandaang milyong puno na ng niyog ang ating maitatanim sa buong Pilipinas,” sumala ni Marcos. / TPM / SunStar Philippines