Pormal nga ilusad ang P20 rice program sa mga lokal nga kagamhanan sa Lalawigan sa Sugbo karon, Mayo 1, 2025.
Kini maoy gipahibalo ni Cebu Governor Gwendolyn Garcia.
“I am assured that the secretary of Agriculture will be present,” matod ni Garcia sa Abril 30, 2025.
Lakip sab sa programa ang mga mag-uuma nga gihatagan og kagawasan nga makabaligya sa ilang mga produkto.
“This will be on a simultaneous basis, other towns and other cities will be viewed into the LED screens selling also the P20 rice. The selling of rice will be done by the Secretary not us,” dugang ni Garcia.
Nasayran nga moabot sa 1,000 ka sako sa bugas ang gipagawas sa National Food Authority (NFA) Region 7 sa mga lokalidad sa Sugbo alang sa pagpatuman sa maong programa.
Aduna nay inisyal nga 27 ka mga lokalidad sa lalawigan nga nakakuha na sa ilang suplay sa bugas gikan sa bodega niini.
Sa kasamtangan, anaa sa 11,000 ka sako sa bugas ang anaa sulod sa bodega sa NFA.
Gilauman sab ang laing hugna sa delivery sa suplay sa bugas sa buhatan gikan sa laing rehiyon aron madugangan ang stocks niini.
Ang NFA nipahibalo nga ang mga lokalidad nga nikuha og bugas gikan sa buhatan duna nay aprubadong alokasyon gikan sa Food Terminal Incorporated.
Sa dili pa mogawas ang supplies gikan sa bodega, gipasalig nga moagi kini sa pagsusi sa verifier sa NFA aron masiguro nga maayo ang klase sa bugas ang ipadala sa mga LGU.
Giingong first come, first serve sab ang ipatuman sa NFA alang sa mga naglinya nga mga truck sa LGU nga naghuwat sa ilang suplay sa bugas. / ANV