PIPILA ka mga drayber ug operator sa Public Utility Vehicle (PUV) ang mireklamo sa giingong sobra nga pagkolekta sa terminal fee sa Pajo Terminal, nga tag P20 imbes nga P5.
Si outgoing Mayor ug Congressman-elect Junard “Ahong” Chan nakigtagbo sa mga drayber ug operator sa PUV sa Biyernes, Hunyo 27, 2025, aron pagtubag sa ilang mga kabalaka bahin sa terminal fee ug uban pang isyu sa operasyon.
Gipahigayon ang miting human nag-viral ang video nga gipasanginlan sa mga drayber ang usa ka kawani sa terminal sa sobrang paningil.
Atol sa miting, gihisgutan ang kabalaka sa mga drayber sa PUV bahin sa P20 nga terminal fee nga gikolekta, nga sukwahi sa ordinansa sa 2024 nga nagtakda sa P5 nga rate.
Gipadayag usab sa mga drayber ang bayad nga gipaningil alang sa paggamit sa kasilyas sa terminal, nga P5 alang sa pagpangihi ug P20 alang sa pagkalibang.
Gidemanda nila nga wagtangon ang pagkolekta sa bayad.
Gipasaligan ni Chan ang mga drayber nga mitambong sa forum nga iyang imbestigahon ang maong pasangil.
Giklaro usab niya ang kamahinungdanon sa bukas nga komunikasyon tali sa mga operator sa terminal, mga opisyal sa siyudad, ug mga drayber aron malikayan ang dugang panagbangi ug mapalambo ang pagdumala sa mga public terminal.
Laing miting ang gikatakda sa Lunes, Hunyo 30, aron matubag ang ubang mga kabalaka. / Yvon Maratas, Benedicto College Intern