Sobra sa 55,000 ka sakong well-milled rice ang niabot sa Sugbo ubos sa P20 per-kilo rice program, pahibawo sa National Food Authority (NFA) Administrator niadtong Biyernes, Mayo 23, 2025.
Moabot sa 35,000 ka sakong bugas ang niabot gikan sa Lalawigan sa Occidental Mindoro ug laing 20,000 gikan sa Iloilo ug gipundo sa bodega sa NFA-7 sa Pier 6, Cebu City.
Dunay laing 13,000 ka sakong bugas ang moabot gikan sa Region 8, 9, ug 10.
Si NFA Administrator Larry Lacson maoy nangulo sa pag-inspection sa nindot nga kalidad sa NFA rice nga ipamaligya sa nagkalainlaing Local Government Units sa Lalawigan sa Sugbo sa tag P20 matag kilo.
Naobserbahan ni Lacson nga ang “regular stocks — 0–3 months” ug “aging stocks — 3 months old gikan sa paggaling” mga top quality.
Iyang gipasabot nga ang tanang NFA well-milled rice, 25 porsyento nga broken rice ug way baho.
Apan ang mga aging stocks gipamaligya sa tag P20 matag kilo sa Kadiwa Center, samtang puyde usab kini nga i-supply sa mga institutional government agencies sama sa mga jail facility.
“Kung bumibili kami sa magsasaka, wala kaming pinipiling variety o magandang quality, lahat binibili namin. In short random yan. Syempre gusto natin walang insektong buhay, ang bigas naman talaga may insekto yan sa katagalan lalo na sa NFA,” matod ni Lacson.
Dunay 130 ka sakong bugas gikan sa bodega sa NFA-7 sa Banilad, Cebu City ang gipanghatod sa Lungsod sa Catmon sa amihanang Sugbo sa Biyernes.
Gihatod sab sa ubang kalungsoran sama sa San Fernando, Pinamungahan, Medellin, Tabogon, ug Talisay City ang ilang rice allocation kagahapon.
Kini mga regular stocks alang sa subsidized program. / EHP