P200K nakuha sa tulisan sa coop

FOOTAGE: Imbestigador sa Mandaue City Police Station mitan-aw sa CCTV footage sa usa ka sanga sa 7/11 nga gitulis sa duha ka mga tawo.
FOOTAGE: Imbestigador sa Mandaue City Police Station mitan-aw sa CCTV footage sa usa ka sanga sa 7/11 nga gitulis sa duha ka mga tawo. TAMPO SA MCPO

Usa ka sanga sa Lamac Multipurpose Cooperative sa Barangay Luray II, dakbayan sa Toledo, gitulis sa nag-inusarang tulisan alas 10 sa buntag sa Biyernes, Enero 12, 2024.

Dili mominos P200,000 ang malampusong nakuha sa tulisan nga wa pa mailhi.

Sa pagkighinabi sa Superba­lita Cebu kang Police Lt. Col. Manolo Salvatierra, hepe sa kapulisan sa Toledo, nasayran nga ang security guard wa maka­santa sa tulisan ug nag-malfunction usab ang alarm device.

Ang nag-inusarang tulisan gihulagway ni Salvatierra nga nagkalo, nag-bonnet ug nag sul-ob og jacket nga kolor itom ug nagmotorsiklo nga niabot sa dapit.

Matod ni Salvatierra, ang tulisan nagpakaaron-ingnon nga kliyente sa coop apan sa dihang gipasu’d sa security guard, kalit kining nition og pusil busa ang security guard wa na makapalag. Samtang, wa usab makapatingog ang teller sa ilang alarm device kay guba.

Ang security guard nga armado og .38 kalibreng service firearm wa hinuon dis-armahi sa tulisan.Ang Special Weapons and Tactics (Swat) team pakyas sa ilang road blocking sa posibling agian sa tulisan.

Atol ning pagsuwat, nagpadayon pa ang imbestigasyon ug pagsubay sa mga CCTV camera aron pag-ila sa tulisan.

7/11 GITULIS

Usa ka sanga sa 7/11 nga nahimutang sa Dan Marivel, Brgy. Alang-Alang, Mandaue City gitulis sa duha ka mga tawo ug nakuhaan og P25,000.

Base sa imbestigasyon sa kapulisan sa Station 1 sa Mandaue City Police Office (MCPO) ubos sa kamanduan sa ilang hepe nga si Police Maj. Michael S. Roque nga ang pagpanulis nahitabo alas 12 sa tungang gabii sa Enero 11, 2024.

Matod pa nga may duha ka wa mailhing mga lalaki nga nagpakaaron ingnong mga kustomer.

Ang usa armado og pusil, nition ngadto sa cashier ug sa store attendant ug nideklarar og tulis.

Matod sa kapulisan nga way security guard ang maong sanga.

Dali’ng ningsibat ang mga tulisan ug wa na maabti sa kapulisan nga ningres­ponde.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph