NABALHOG sa Police Station 4 sa Lapu-Lapu City Police Office (LLCPO) ang usa ka 18 anyos nga ulitawo human nakuhaan og mga dagkong putos sa pinaugang marijuana atol sa buy-bust sa alas 9:51 sa gabii sa Sabado, Mayo 31, 2025, sa Agus Proper, Barangay Agus, Dakbayan sa Lapu-Lapu.
Ang nadakpan giila nga si alyas Mark, 18, residente sa Sitio Atabay sa maong barangay.
Nasakmit sa mga sakop sa Station Drug Enforcement Unit sa LLCPO sa pagpangulo sa ilang hepe nga si Police Major EraƱo Regidor ang duha ka dagko ug tulo ka gagmay nga putos sa pinaugang dahon sa marijuana nga motimbang sa 1,671 gramos nga dunay standard drug price nga P200,520.
Matod ni Regidor nga bag-o lang nigawas ang pangalan ni Mark sa pagpamaligya og marijuana sa maong barangay apan nabutang na siya sa high value individual category tungod kay makabaligya matod pa kini og 1 ka kilo nga marijuana matag semana.
Kalapasan sa Section 5 ug 11, Article II, Republic Act 9165 kon Comprehensive Dangerous Drugs Act of 2002 ang gipasaka nga kaso sa kapulisan batok sa suspek. / AYB