Mamahimo nang mapalit sa minimum wage earners ang tag P20 nga kilo sa bugas nga gitanyag sa administrasyon ngadto sa mga labing nagkinahanglan.
Ang Department of Agriculture (DA), uban ang Department of Labor and Employment (DOLE) gilusad niadtong Biyernes, Hunyo 13 sa nationwide rollout sa pagtugot na sa pagbaligya sa P20 nga kilo sa bugas sa mga minimum wage earners o kining nag-sweldo og minimum.
“This isn't just about rice— it is about dignity. It is about proving that the government can deliver for the Filipinos who need it most,” matod ni Agriculture Secretary Francisco Tiu Laurel Jr.
“We are fulfilling President Marcos' promise of affordable food—subsidized for now, but ideally self-sustaining in the future through agricultural modernization,” dugang niini.
Si Labor Secretary Bienvenido Laguesma sa iyang bahin nagkanayon nga ang pagpalapad sa maong programa mahinungdanon alang sa tumong sa administrasyon sa pagsuporta sa nasod ngadto sa labing nagkinahanglan nga sektor.
Dugang niya nga makapahimulos ang dul-an 120,000 ka minimum wage earners niini lukop nasod.
Unang gilusad ang programang “Benteng Bigas, Meron Na!” sa Visayas niadtong Mayo 1 ug dayon nahimong pwede mapalit sa mga Kadiwa ng Pangulo centers sa nagkadaiyang parte sa Luzon.
Ang maong bugas nga ubos sa programa, gikan sa mga reserba nga napalit sa National Food Authority (NFA) gikan sa lokal nga mga mag-uuma.
Una kining gitanyag ngadto sa solo parents, senior citizens, persons with disabilities (PWD), ug sa indigents.
Mipasalig si Presidente Ferdinand “Bongbong” Marcos Jr. ngadto sa publiko nga adunay igong supply sa bugas aron makalungtad sa programa nga tag P20 nga kilo sa bugas nga mapahimuslan sa kapin 60 milyunes ka mga Pinoy.