
Gipahibawo ni Gobernador Gwendolyn Garcia nga kasamtangan una nga ihunong ang pagbaligya sa tag P20 matag kilo sa bugas sa tibuok Probinsya sa Sugbo samtang huwaton ang klarong lagda gikan sa Commission on Elections (Comelec).
Ang pahibawo gihimo atol sa press conference sa Cebu Provincial Capitol niadtong Sabado, May 3, 2025, duha ka adlaw human sa opisyal nga paglusad sa programa niadtong Mayo 1.
Ang paghunong sa pagbaligya sa tag P20 nga kilo sa bugas hangtod sa Mayo 12 nga national ug local elections.
Matod sa gobernador nga samtang gihatagan og exemption ang Sugbo gikan sa election ban alang sa “Sugbo Merkadong Barato” initiative, nagkinahanglan gihapon siya og klarong opinyon sa Comelec kalabot sa rice subsidy program.
“I’m hoping that I can get a definitive position from the Comelec,” matod ni Garcia.
Ang pagpahunong subay sa pamahayag ni Comelec Chairman George Erwin Garcia nga ang tanang matang sa financial assistance o “ayuda”, gidili atol sa election period gikan sa Mayo 2 hangtod sa Mayo 12, ang gitugotan kadto lang medical ug burial assistance.
Samtang si Capitol consultant Atty. Rory Jon Sepulveda nagkanayon nga ang programa wa giwagtang apan gihunong lang agi og pagtahod sa lagda sa Comelec.
“The term is not to discontinue, apan gihunong lang una while we are checking on it. We have to be clear about it,” matod ni Sepulveda.
Mga opisyal nagkanayon nga ang probinsya andam mopabalik sa pagbaligya sa baratong bugas human na sa leksyon sa Mayo 13.
Ang Kadiwa ng Pangulo P20 (KnP20) program sa Department of Agriculture (DA) maoy pagtuman sa saad ni Presidente Ferdinand Marcos Jr. nga himuong tag P20 matag kilo ang bugas.