P20M balor sa shabu, nasakmit sa Lapu-Lapu

P20M balor sa shabu, nasakmit sa Lapu-Lapu
SunStar Local News GPX

Giilang bodegero o punduhanan og drugas nasakmitan sa kapulisan og tulo ka kilo nga shabu nga dunay standard drug price nga P20 milyunes sa drug bust sa Barangay Gun-ob, dakba­yan sa Lapu-Lapu, alas 4 sa hapon sa Biyernes, Dis­yembre 22, 2023.

Ang suspek nga nasikop giila nga si Jerome Abanto, 43 , ulitawo, taga Barangay Ermita, siyudad sa Sugbo.Nasakmit gikan kaniya ang tulo ka kilo nga shabu, P400,000 cash, .45 kalibre nga pistola uban sa mga bala niini.

Ang malampusong operasyon iya sa hiniusang pwersa sa City Intelligence Unit ug City Drug Enforcement Unit sa Lapu-Lapu City Police Office (LCPO) ubos sa kamandoan sa ilang hepe nga si Police Col. Elmer S. Lim.

Niabag usab ang Naval For­ces Central (Navforcen) ug Philippine Drug Enforcement Agency (PDEA 7).

Si Police Lt. Col. Christian Torres, tigpamaba sa LCPO, nihulagway kang Abanto nga usa ka bodegero og shabu ug bag-ong nailhan sa kapulisan nga high value individual (HVI) sa regional level.

Matod ni Torres, si Abanto nag-operate sa highly urbanized nga mga dakbayan sa Sug­bo, Mandaue ug Lapu-Lapu.

Dugang niya nga pipila ka buwan lang nga gi-validate ug gi-monitor ang suspek human nakadawat og kasayuran bahin sa ilegal nga kalihukan niini.

Gipasabot ni Torres nga dili molahutay ang pagpayuhot og gidiling drugas sa dakbayan tungod sa ilang hugot nga monitoring ug pagpaniid labi na ning panahon sa Pasko nga gilantawan nga mosaka ang negosyo sa drugas.

Dugang niya nga walay luna ang mga durugista sa Lapu-Lapu sama sa nahitabo kang Abanto.

Gitanggong si Abanto sa LCPO alang sa dugang imbestigasyon ug gikatakda nga pasakaan og tukmang kaso.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph