P2.4M danyos sa sunog sa gun store

FIRING RANGE: Nagsugod ang sunog sa indoor firing o shooting range sa Armscor Shooting Center Inc. sa 101 Centro Maximo Bldg., dan D. Jakosalem, Barangay Cogon Ramos, dakbayan sa Sugbo, alas 11:00 sa buntag, Huwebes, Pebrero 1, 2024.
FIRING RANGE: Nagsugod ang sunog sa indoor firing o shooting range sa Armscor Shooting Center Inc. sa 101 Centro Maximo Bldg., dan D. Jakosalem, Barangay Cogon Ramos, dakbayan sa Sugbo, alas 11:00 sa buntag, Huwebes, Pebrero 1, 2024. Arnold Y. Bustamante

Nikabat sa P2.4 milyunes ang danyos sa indoor firing o shooting range sa Armscor Shooting Center Inc. sa 101 Centro Maximo Building, dalan D. Jakosalem, Barangay Cogon Ramos, dakbayan sa Sugbo, alas 11:00 sa buntag, Huwebes, Pebrero 1, 2024.

Giisa dayon sa kabomberuhan sa dakbayan sa Sugbo ang unang alarma sa sunog sa alas 11:04 sa buntag ug pagka alas 11:06 sa buntag, gisaka sa 2nd alarm.

Si Fire Officer (FO3) Fulbert Navarro, imbestigador sa Cebu City Fire Office (CCFO), niingon nga ilang nakontrolar ang kayo sa alas 11:32 sa buntag, diin wala na makakatap pa sa laing buhatan sa maong building.

Pagka alas 11:43 sa buntag hingpit na kini nga napawong.

Matod ni Navarro nga nagsugod ang kayo sa firing range nga naa sa kilid sa building nga niadtong tungora dunay nagpabuto sa armas.

Wala pa nila mahibaw-i kon unsay nakaingon nga misilaob kini ug miabot sa ilang bodega sa ikaduhang andana.

“Initially, ang report nila didto ra sa sulod sa shooting range mismo niya. Ato pa ning tan-awon didto kon unsay cause kay dili pa ta kasulti kon unsay cause ana,” matod ni FO3 Navarro.

Giangkon niya nga nag-amping sila sa pagsulod sa building sanglit ang nasunog namaligya og armas ug mga bala nga maoy hinungdan nga ilang giseguro nga dili madisgrasya ang ilang mga firemen.

Usa sa nasugata’ng problema sa mga bombero ang kapuot sa aso sa sulod sa firing range hinungdan nga gigamitan nila kini og breathing apparatus.

Atol ning pagsuwat, ang CCFO nag-imbestigar bahin sa hinungdan sa sunog.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph