Kapin sa P24 milyunes nga balor sa ilegal nga drugas ang nasakmit sa Police Regional Office (PRO) 7 sulod sa pito ka adlaw nga simultaneous anti-criminality and law enforcement operation ug pagkasikop sa 86 ka wanted persons og pagkaimbargo sa 50 ka armas nga walay lisensya.
Gikan sa Hulyo 13-19, 2025, ang PRO 7 nilusad og high-impact operations nga nag-target sa ilegal nga drugas, loose firearms, ug wanted persons lakip na ang illegal gambling subay sa pagpalig-on sa ilang internal security and crime suppression campaign.
Sa data nga gipahibalo sa PRO 7, nakalusad ang kapulisan og 146 ka anti-illegal drug operations nga nisangpot sa pagkasikop sa 163 ka drug personalities ug pagkasakmit sa gibana-banang 3.5 kilos nga gituohang shabu nga dunay standard drug price nga P4,013,384 ug unom ka gramos nga dahon sa marijuana.
Sa kampanya batok sa loose firearms, ang PRO 7 nakahimo og 49 ka operations nga niresulta sa pagkasikop sa 21 ka indibiduwal ug pagkasakmit sa 50 ka nagkalainlaing kalibre sa armas, usa ka eksplosibo ug 69 ka rounds sa bala.
Samtang sa manhunt operation batok sa mga wanted persons, nakasikop sila og 86 ka akusado nga dunay mga pending warrant of arrest diin 22 niini giila nga most wanted persons.
Sa pagpatuman sa PRO 7 sa kampanya batok illegal gambling, nakasikop ang kapulisan og 44 ka mga sugarol nga naaktuhan nga nagsugal sama sa hantak ug tigbakay ug pagkasakmit sa pusta sa sugal nga mokantidad sa P18,237. / AYB