Giila sa kapulisan nga high value individual (HVI) ang nasikop sa buy-bust sa Laray Road, Barangay Jugan, lungsod sa Consolacion, amihanan sa Sugbo, alas 3 sa kaadlawon, Dominggo, Hulyo 14, 2024.
Nasikop sa hiniusang operasyon sa kapulisan giila nga si alyas Bugtong, 43, ulitawo ug taga Sityo Lawis, Barangay Pasil, siyudad sa Sugbo.
Nasakmitan ang suspek sa gituohang shabu nga motimbang og dili mominos 300 gramos nga may standard drug price nga P2,040,000 ug 850 ka ampules sa gidudahang Nubain nga may standard drug price nga moabot sa P212,500.
Ang suspek nadakpan sa joint buy-bust sa mga sakop sa Provincial Intelligence Unit ug Provincial Drug Enforcement Unit (PIU/PDEU) ug Consolacion Police Station.
Matod pa nga ang suspek sa dihang na-validate nga dinagkuay ang pamaligyag shabu, gilusad dayon sa kapulisan ang buy-bust sa koordinasyon sa Philippine Drug Enforcement Agency (PDEA) 7.
Sa dihang nadakpan ang suspek, nakuhaan pa kini sa iyang posisyon og upat ka gagmay nga pakite, tulo ka medium size ug duha ka large packs sa gidudahang shabu.
Gawas sa mga gidudahang shabu, may 850 ampules sa gidudahang nubain. / DVG