Nagtuo nga dili masakpan, usa ka kahera sa pawnshop ug remittance center sa Barangay Buanoy, Lungsod sa Balamban nihimo og transaksiyon pinaagi sa pagpahigayon og money transfer paingon sa iyang personal account gamit ang e-wallet app.
Si alyas Daisy, 39, ang gipadakop sa management sa pawnshop nga iyang gialagaran sa dihang nasakpan ang iyang binuhatan niadtong alas 6:10 sa gabii, Miyerkules, Agusto 5, 2026, sa Barangay Buanoy, Balamban.
Kasong qualified theft ang atubangon ni Daisy sa dihang moabot sa P327,900 ang iyang nasakiyo gipaagi sa e-wallet nga transaksiyon.
Tungod kay adunay accesss si Daisy sa portal sa pawnshop, sayon ra niya nga gi-cash in ang kuwarta sa kompaniya paingon sa iyang sa iyang personal account.
Nasuta sa imbestigasyon nga adunay mga siyam ka higayon nga iya kining gihimo base sa nakuha nga mga transaction record.
Nabunggo ang binuhatan sa suspek sa dihang nihimo og audit ang management og nakita ang wa pagtakdo sa mga transaksiyon ngadto sa ilang rekord.
Nasubay nga ang unauthorized transactions gihimo sa nagkalainlain nga oras ug mga adlaw.
Samtang si Police Major Ian Macatangay, hepe sa Balamban Police Station nga nahinabi sa Superbalita Cebu nitug-an nga base sa pamahayag sa suspek, ang maong kuwarta iyang gi-invest og negosyo.
Apan gidemalas tungod kay na-scam siya hinungdan nga wa mauli ang maong kantidad.
Nagtuo ang kapulisan nga pasangil lang sa kahera ang matod pa iyang gi-invest ang kuwarta kay way nakuha nga ebidensiya nga nagpamatuod nga siya nailad o na-scam. / GPL
