Nasikop sa kapulisan sa Ninoy Aquino International Airport (NAIA) ang usa ka pasahero nga nisuway sa pagpalusot og dul-an sa P30 milyones nga balor sa methamphetamine hydrochloride, nga nailhan usab nga shabu.
Sa usa ka pamahayag, gibutyag sa Philippine Drug Enforcement Agency (PDEA) nga ang NAIA Inter-Agency Drug Interdiction Task Group (IADITG) nakasakop sa suspek nga usa ka 43-anyos nga Pilipina, kinsa niabot gikan sa Kuala Lumpur, Malaysia, alas 1:35 sa hapon niadtong Hunyo 14, 2025.
Nahimo ang pagsakop human madiskubre ang gibanabanang 4,368 gramos sa shabu, nga gitago sulod sa iyang bagahe.
Ang illegal nga druga, nga adunay gibanabanang kantidad nga P29,702,400, nakaplagan nga giputos sulod sa usa ka hinimohimo nga itom nga pouch nga ginama sa duct tape, gitago ilalom sa mga pinundok nga sinina, tualya, habol, ug comforter.
Ang suspek pasakaan og kaso tungod sa paglapas sa Section 4, Article II sa Republic Act 9165.
Si PDEA Director General Undersecretary Atty. Isagani Nerez nagkanayon nga ang kining pagkasikop sa suspek nagpakita sa hugot nga pasalig sa PDEA ug sa kauban niini nga mga ahensya sa pagpanalipod sa sa nasod batok sa internasyonal nga drug trafficking.
“This interdiction success is a product of strong collaboration between PDEA and our law enforcement partners. Our presence in major airports, seaports, and cargo facilities is not just necessary; it is imperative,” matod ni Nerez. (TPM/SunStar Philippines)