Duha ka gidudahang tigpayuhot sa illegal nga drugas sa siyudad sa Tagbilaran, probinsya sa Bohol ang nadakpan sa gilusad nga buy-bust sa Tagbilaran City Police Station sa alas 6:08 sa gabii, Sabado, Hunyo 7, 2025 sa Purok 4, Barangay Cabawan sa maong dakbayan.
Ang mga nadakpan giila nga silang Climaco Cinconiegue Luzon alyas Proco, 39, usa ka mekaniko sa mga motor nga taga Purok 3, Barangay Biking, lungsod sa Dauis, ug Wilbert Ladeza Velozo alyas Doking, 48, nagpuyo sa Barangay Anislag lungsod sa Maribojoc.
Nakuha gikan kanila ang upat ka dagkong binulto sa gituohang shabu nga motimbang sa 500 gramos nga dunay standard drug price nga P3.4 million.
Ang mga nakuha nga ebidensya giduso na sa PNP Forensic Unit alang sa himuon nga chemical analysis.
Matud ni Police Lieutenant Colonel John Kareen Escober, ang hepe sa Tagbilaran City Police Station, nga duha ka buwan nila nga gi-monitor ang mga suspetsado human migawas ang ilang mga pangalan.
Giingong makabaligya si alyas Proco og 100 gramos nga shabu matag semana gikan sa iyang supplier.
Midugang si Escober nga tungod sa pagkasakmit sa maong gidaghanon sa illegal nga drugas daghang kinabuhi ang masalbar sa kadaot niini ngadto sa komunidad.
“Every gram we take off the streets is a life we save. This is more than law enforcement — this is our promise to protect the future of Tagbilaran,” matud ni Escober.
Ang maong operation tipik og kabahin sa Oplan Limpyo Tagbilaran nga programa nga gipatuman ni Police Brigadier General Redrico Maranan nga nagtutok sa agresibo nga kampanya batok sa ilegal nga drogas.
Giandam na ang kasong kalapasan sa Section 5 ug 11, Article II, Republic Act 9165 nga ipasaka sa Tagbilaran PNP batok sa duha ka suspetsado. / AYB