Mga P3.4 milyunes nga balor sa ilegal nga drugas nasakmit sa Philippine Drug Enforcement Agency 7 (PDEA 7) ug kapulisan sa managlahi nga anti illegal drug operations sa Dakbayan sa Sugbo ug Talisay.
Alas 9:40 sa Biyernes sa gabii, Hunyo 7, 2024, usa ka bag-ong drug personality sa Bo. Luz, Dakbayan sa Sugbo, nadakpan sa buy-bust sa mga sakop sa PDEA 7 uban sa Mabolo Police Station sa Cebu City Police Office.
Ang suspek giila nga si Boyet Ancajas, 28, residente sa Brgy. Luz, Siyudad sa Sugbo.
Nakuha sa mga operatiba ang pito ka putos sa gituohang shabu nga motimbang og 115 gramos nga dunay estimated average market value nga P782,000.
Si Ancajas bag-o lang nigraduwar sa junior high school.
Gibutyag ni Leia Alcantara, information officer sa PDEA 7, nga nakuha nila ang kasayuran gikan sa usa ka confidential informant labot sa pagpamaligya ni Ancajas sa ilegal nga drugas.
Gipaubos dayon nila sa usa ka semana nga case buildup ang suspek, diin ilang nasayran nga makabaligya siya og 300 gramos nga shabu matag semana.
Dugang ni Alcantara nga bag-o nga nailhan si Ancajas nga drug player, apan ilang nasuta nga sinaligan kini sa usa ka big time drug personality nga nag operate sa tibuok isla sa Sugbo.
Kalapasan sa Section 5 ug 11, Article II sa Republic Act 9165 ang giandam nga kaso batok sa suspek.
Samtang usa ka laborer nadakpan usab sa buy-bust sa mga sakop sa Special Operation Unit 7 sa PNP Drug Enforcement Group alas 10:03 sa Biyernes sa gabii sa Climaco Street, Brgy. Pahina Central, Dakbayan sa Sugbo.
Ang suspek giila nga si Jhon Rexcer Barra Villacorte, alyas Ontot, 22, taga Sitio Taytayan, Brgy. Buhisan, Siyudad sa Sugbo.
Nakuha gikan kaniya ang dagkong putos sa gituohang shabu nga motimbang og 200 gramos nga dunay standard drug price nga P1,360,000.
Kasong paglapas sa RA 9165 ipasaka batok kaniya.
TALISAY CITY
Duha ka gikAtahapan nga mga durugista nasikop usab sa buy-bust sa Talisay City Police Drug Enforcement Unit ubos sa kamanduan sa ilang hepe nga si P/Lt. Col. Epream Paguyod.
Nasakmit sa mga polis ang 250 gramos sa gituohang shabu nga dunay SDP nga P1.7 milyunes ingon man .38 kalibreng revolver nga dunay tulo ka mga bala.
Nasikop sa buy-bust sa Purok Mangga, Brgy. Camp 4, mao sila si alyas Eboy, 54, ulitawo, taga V. Rama Avenue, Brgy. Calamba, sa Siyudad sa Sugbo, nga maoy target ug si alyas Mo, 39, taga Purok Rosas, Brgy. Lower Linao, lungsod sa Minglanilla.
Nakadawat og impormasyon ang Talisay police sa pagpamaligya og shabu busa ilang gipanid-an.
Dihang ilang nakompirmar, ila dayon nga gilusad ang buy-bust gamit ang P50,000 nga peke nga kwarta.
Dihang nasikop si Eboy, siya nakuhaan og laing pito ka putos sa gituohang shabu ingon man kalibre .38 nga revolver.
Si Mo nakuhaan og laing duha ka putos sa gituohang illegal drugs. / AYB, DVG