P3.4M nga drugas nasakmit sa 2 ka operasyon sa Cebu City

SunStar Cebu City
SunStar Cebu City

Moabot sa P3.4 milyunes nga balor sa ilegal nga drugas ang nasakmit sa kapulisan sa managlahi nga operations sa Dakbayan sa Sugbo.

Unang anti-illegal drug operation gilusad sa Regional Drug Enforcement Unit 7 sa Sitio Black Cats, Brgy. Duljo Fatima sa Dakbayan sa Sugbo alas 10:05 sa Lunes sa gabii Hunyo 17, 2024 nga miresulta sa pagka sikop sa usa ka E-Bike driver.

Ang suspek giila nga si alyas Demot, 33, taga Spolarium Street, Brgy. Duljo Fatima, dakbayan sa Sugbo. Nakuha gikan sa suspek ang binulto nga gituohang shabu nga motimbang og 300 gramos nga dunay standard drug price nga P2,040,000.

Usa ka semana nga gipaubos sa monitoring sa RPDEU 7 ang suspek human madawat ang impormasyon diin makabaligya kini og 500 grams matag semana.Ang iyang area sa distribution mao ang Mambaling, Duljo Fatima ug kasikbit nga mga barangay sa dakbayan sa Sugbo.

Samtang ang Inayawan police station nakasikop usab og duha ka high value individual sa Sitio Bamboo, Barangay Basak Pardo, Siyudad sa Sugbo.

Ang nadakpan giila nga silang alyas Melo, 53, ug alyas Sean, 34, kinsa nakuhaan og pinutos sa gituohang shabu. Ang duha pulos taga Sitio Ubca 3, Barangay Quiot, Dakbayan sa Sugbo.

Nakuha sa mga operatiba sa Inawayan Police Station ang dagkong mga putos sa gituohang shabu nga motimbang og 210 nga dunay standard drug price nga P1,428,000.

Kasong kalapasan sa Section 5 ug 11, Article II sa Republic Act 9165 kun Comprehensive Dangerous Drugs Act of 2002 ang mga suspek. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph