Nadakpan sa mga sakop sa Philippine Drug Enforcement Agency (PDEA 7) ang usa ka high value individual (HVI) sa Barangay Lamac, lungsod sa Consolacion, amihanang Sugbo, atol sa buy bust sa alas 5:50 sa hapon sa Dominggo, Nobiyembre 5, 2023.
Ang suspek giila nga si Philip Llaguno, 41, lumolupyo sa naasoy nga dapit.
Nakuha gikan sa suspek ang 10 ka pakete sa gituohang shabu nga may gibug-aton nga 550 gramos nga dunay street drug price (SDP) nga P3,740,000 lakip na ang cellphone ug mga drug paraphernalia.
Matod ni Leia Alcantara, information officer sa PDEA 7, ang suspek nadakpan na niadtong 2009 sa ilegal nga drugas apan nibalik sa iyang negusyo human nakagawas sa bilanggoan.
Usa ka buwan nga gipanid-an sa PDEA 7 ang suspek una gihimo ang buy-bust.
Nakuha nga kasayuran gikan sa kasaligang tinubdan nga kini maka-dispose og duha ka kilo matag semana.