Usa ka job order (JO) employee sa kagamhanan sa Lungsod sa Calape, probinsya sa Bohol ang nadakpan sa gilusad nga buy-bust sa Tagbilaran City Police Station alas 7:03 sa gabii sa Sabado, Abril 12, 2025, sa Purok 1, Barangay Manga, Dakbayan sa Tagbilaran.
Ang suspek giila nga si Elwin Paredes alyas Wengweng, 49, residente sa Purok 4, Barangay Calunasan, Lungsod sa Calape.
Nasakmit sa mga sakop sa City Drug Enforcement Team sa Tagbilaran City Police Station sa pagpangulo sa hepe niini nga si Police Lt. Col. John Kareen Oliveros Escober gikan niini ang binulto nga putos sa gituohang shabu nga motimbang sa 550 gramos nga nagbalor og P3,740,000.
Matod ni Escober, bag-o nga drug personality si Paredes base sa ilang subsob nga pagpaniid.
Gibutyag ni Escober nga ilang gipaubos sa tulo ka semana nga surveillance si Paredes human sila nakadawat og impormasyon nga namaligya kini’g illegal nga drugas.
Giingon ang area of distribution ni Paredes mao ang tibuok Calape ug sa mga lungsod nga nagpaingun sa Tagbilaran.
Ang pagkasikop ni Paredes kabahin kini sa gipatuman sa kapulisan nga "Oplan Limpyo Tagbilaran," nga maoy nag-unang programa sa Tagbilaran City Police Station.
“Kini nga kalampusan nagpakita nga seryoso ang kapulisan sa pagpakigbatok sa ilegal nga druga. Uban ang suporta sa atong LGU ug sa katawhan, padayon ang Oplan Limpyo Tagbilaran sa pagtukod og malinawon ug luwas nga siyudad,” matod ni Escober.
Dunay gipangtug-an si Paredes sa gihimong imbestigasyon nga maoy subayon sa sunod nga follow-up operation sa kapulisan, sigon ni Escober. / AYB