P39M shabu nasakmit, 240 durugista nasikop

P39M shabu nasakmit, 240 durugista nasikop
File photo

Moabot ngadto sa P39.3 milyunes nga balor sa ilegal nga drugas ang nasakmit sa kapulisan sa Central Visayas atol sa usa ka semana nga anti-criminality operations gikan sa Marso 24-31, 2024.

Kini niresulta sa pagkasikop sa 240 ka drug personalities.

Sa data nga gihatag sa Police Regional Office 7 (PRO 7), nakasakmit ang tanang units sa kapulisan sa Central Visayas og 5,789.76 gramos nga gituohang shabu nga dunay standard drug price (SDP) nga P39,370,368 uban sa mga drug paraphernalia.

Nakasikop sab sila og 190 ka wanted persons nga nag-atubang og nagkalainlaing mga kaso sa korte, 21 kanila nabutang sa listahan sa most wanted persons.

Wala usab lugaki sa PRO 7 ang ilang kampanya batok sa loose firearms, diin nakasakmit sila og 203 ka dili lisensyado nga armas atol sa ilang Oplan Katok ug operations, pito ka explosives ug 162 ka mga bala nga niresulta usab sa pagkasikop sa 39 ka mga tawo.

Subay niini, gidayeg ni Police Brigadier General Anthony Aberin, hepe sa PRO 7, ang iyang mga sakop nunot sa walay hunong nga kampanya batok sa kriminalidad.

Samtang ang subsob nga kampanya batok sa kriminalidad usa sa gitan-aw nga mga hinungdan nga malinawon sa kinatibuk-an ang pagtimaan sa Semana Santa sa rehiyon 7. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph