P40 nga minimum nga pletihan ‘imposible’ pa ning panahuna

IMPOSIBLE: Ang traditional ug modern PUJ makita sa padayon pa nga gi-construct nga Cebu Bus Rapit Transit (CBRT) project sa may Osmeña Blvd.,Cebu City. Gisalikway sa transportation official nga sa pagpatuman sa modernisasyon sa public transport, moabot og P40 ang minimum nga pletihan. /
IMPOSIBLE: Ang traditional ug modern PUJ makita sa padayon pa nga gi-construct nga Cebu Bus Rapit Transit (CBRT) project sa may Osmeña Blvd.,Cebu City. Gisalikway sa transportation official nga sa pagpatuman sa modernisasyon sa public transport, moabot og P40 ang minimum nga pletihan. / AMPER CAMPAÑA

Usa ka opisyal sa Land Transportation Franchising and Regulatory Board sa Central Visayas (LTFRB 7) niingon nga imposible nga mosaka og maayo ang minimum nga plitehan sa modernong jeepney ngadto sa P40 gikan sa P15 karon.

Kini taliwala sa pangangkon sa usa ka local transport leader nga nipasidaan nga motaas ang plitehan kon hingpit nang ipatuman ang Public Utility Modern Vehicle Program (PUVMP) nga nakaalarma sa pipila ka mga sumasakay.

Si Reynaldo Elnar, chief transportation development officer sa regulatory board, nisalikway niini nga mga pangangkon, nga nag-ingon nga ang tanang pag-usbaw sa pletihan moagi sa hingpit nga diskusyon aron makonsiderar ang mga opinyon gikan sa lainlaing stakeholders.

“Dili gyud na in-ani nga madali nga mosaka kay [magkinahanglan] man gyud nga naay petition,” sulti niya sa SunStar Cebu sa Sabado sa hapon, May 4, 2024.

Sa pagkutlo sa unang pamahayag ni Department of Transportation Secretary Jaime Bautisa sa alegasyon, si Elnar mipalanug nga kasagaran, ang pag-umento sa plitehan unang gibase sa gasto sa gasolina.

Dugang pa ni Elnar nga bisan pa man nga adunay mga usbaw sa pump price, dili sila makapatuman og umento sa kasamtangang minimum nga plitehan sa pampublikong transportasyon.

“Atoa ibutang nga fuel cost na siya, dili na outright nga desisyon nga magpasaka dayon [sa pletehan], kay kinahanglan pa mo-file og petition ang operators, i-allege pa nila unsa ilang basehan tapos studyhan pa sa central office sa Manila kon i-grant ba,” ingon niya.

Matod ni Elnar nga kasagaran kon makadawat og mga petisyon ang ilang ahensya, kinahanglang susihon kini ug himuon ang public hearing sa mga hingtungdan nga stakeholders, lakip na ang mga operator, drayber, ug mga pasahero.

Si Bautista sa usa ka pamahayag niadtong Enero, nagkanayon nga sa pagtagad niini nga mga petisyon, ang National Economic and Development Authority mopagawas usab og opinyon kalabot sa inflationary effect sa bisan unsa nga pagsaka, uban sa paghatag og igong konsiderasyon sa commuting public.

P40

Niadtong Mayo 1, ang SunStar Cebu nitaho nga si Gregory Perez, pangulo sa Pinagkaisang Samahan ng mga Tsuper sa Opereytor Nationwide (Piston) Cebu, nipasidaan nga ang plitehan mahimo’ng mosaka ngadto sa P40 o mas taas pa, base sa forecast sa mga eksperto.

Matod niya nga posibleng mao kini ang senaryo kon ang tradisyunal nga mga jeepney hingpit nga gidid-an sa pag-operate o kon ang modernong mga jeepney momonopoliya sa sektor sa pampublikong transportasyon. / KJF

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph