Moabot sa P40.8 milynes nga balor sa ilegal nga drugas ang nasakmit sa Provincial Drug Enforcement Unit PDEU sa Negros Oriental Police Provincial Office atol sa gilusad nga buy-bust alas 12:33 sa kaadlawon, Martes, Hulyo 15, 2025, sa Purok 5, Barangay Sto. Niño, Lungsod sa San Jose, Probinsiya sa Negros Oriental.
Ang nadakpan giila nga si Paulo Bayhon Dimaano, alyas “Pao”, 36, ulitawo nga taga Barangay Camanjac, Siyudad sa Dumaguete, Negros Oriental.
Nakuha gikan kaniya ang dagkong putos sa gituohang shabu nga motimbang ang tanan sa 6,000 gramos nga dunay standard drug price nga P40,800,000.
Lakip sa nasakmit ang uban nga mga ebidensya sama sa cellular phone nga maoy iyang gigamit sa transaction ug ang sakyanan nga Ford Everest titanium nga maoy gikargahan sa unom ka dagkong putos sa gituohang shabu.
Base sa imbestigasyon sa kapulisan sa probinsiya sa Negros Oriental nga ilang na-monitor ang suspek nga namaligya og dinaghan nga suplay sa ilegal nga drugas nga maoy hinungdan nga ila ning gipaubos sa surveillance.
Human makuha ang tanang impormasyon, gilusad dayon ang buy-bust sa pagpangulo sa hepe sa PDEU nga si Police Captain Jebert Baroy.
Giila si Dimaano nga usa ka high value individual ug ang iyang area sa distribution mao ang Dakbayan sa Dumaguete ug mga silingang Lungsod sa Negros Oriental. Ang mga ebidensya giduso na sa PNP Forensic Unit alang sa himuon nga chemical analysis.
Giandam na ang kasong kalapasan sa Section 5 ug 11, Article II, Republic Act 9165 ang ipasaka sa kapulisan batok sa suspek. / AYB