Moabot sa P4.2 milyunes nga balor sa mga pekeng seasoning products ang nasakmit sa mga sakop sa Criminal Investigation and Detection Group (CIDG) Mandaue City Field Unit gikan sa usa ka bodega sa may dalan P. Gullas, Barangay Sto. Niño, Dakbayan sa Sugbo, Huwebes, Agusto 6, 2026.
Nasikop sa mga operatiba ang usa ka Chinese national nga nagpaila nga tag-iya sa maong mga kargamento nga si alyas Jian Zhou Lin, 42, kinsa kasamtangang nagpuyo sa maong dapit.
Nasakmit sa CIDG ang 440 ka sako nga adunay tagurha ka dagko nga kahon nga naay sulod nga mga pekeng seasoning products nga mokantidad og P4,224,000.
Una niini, nakadawat og reklamo ang CIDG gikan sa Nestlé Philippines, Inc. labot sa ilegal nga pagpamaligya sa mga peke nga Magic Sarap sa Tabo sa Banay.
Nihimo dayon og validation ang mga personnel sa CIDG ug sa dihang nasuta nga tinuod ang maong reklamo, gilusad dayon ang entrapment operation ubos sa "Oplan Mega Shopper"—ang flagship program sa CIDG.
Nagpatuo ang mga polis nga mopalit og binulto nga Magic Sarap sa kantidad nga P72,000.
Sa dihang giandam na ang mga sinakong seasoning, gipangutana sa polis ang dinakpan kon dili ba kini peke. Nipahayag ang suspek nga gikan kini sa Nestlé ug orihinal.
Apan sa dihang gisusi sa representante sa Nestlé Philippines, Inc. nga si Atty. Kara Rosete ang security features, product identification, markings, ug ubang kinaiya sa produkto, nahibaluan nga pulos kini counterfeit ug dili gikan sa Nestlé.
Tungod niini, gipahibalo ang suspek nga nakalapas siya sa balaod ug gidala sa buhatan sa kapulisan.
Kasamtangang gikustodiya sa CIDG 7 si Lin ug gikatakdang pasakaan og kasong kalapasan sa Sections 155 ug 168 subay sa Section 170 sa Republic Act No. 8293 o ang Intellectual Property Code of the Philippines. / AYB
