P47.1M drugs sakmit sa Sacleo sa Central Visayas

P47.1M drugs sakmit sa Sacleo sa Central Visayas
File photo

Moabot sa P47.1 milyunes nga balor sa illegal nga drugas ang nasakmit sa Police Regional Office (PRO 7) atol sa duha ka adlaw nga Simultaneous Anti-Criminali­ty and Law Enforcement Operation (Sacleo).

Nagsugod ang Sacleo sa alas 12:01 sa kaadlawon sa Hunyo 3, 2024 ug natapos sa alas 11:59 sa gabii sa Hunyo 5, 2024 nga niresulta sa pagka sikop sa 327 ka mga suspek.

SHABU

Sa kampanya sa illegal nga drugas, nakasakmit ang PRO 7 og 6,926.53 gramos nga gituohang shabu nga dunay standard drug price nga P47,100,404 ug pagkasikop sa 117 ka drug personalities.

Labing dako nga nasakmit mao ang operation sa mga sakop sa Regional Drug Enforcement Unit (RDEU 7) diin sila nakasakmit og unom ka kilo sa gituohang shabu nga dunay kantidad nga P40.8 milyunes sa usa ka drayber sa habalhabal nga giila nga big time drug pusher.

Ang maong drayber giingong dunay connection sa sulod sa New Bilibib Prison nga maoy iyang supplier sa shabu dinhi sa Sugbo ug Negros Oriental.

SUGAL

Samtang sa kampanya sa illegal gambling, nakasikop ang kapulisan og 109 ka mga suga­rol atol sa 54 ka anti-illegal gambling operations ug pagkasakmit sa P9,686 nga kwarta sa sugal.

Kasagaran niini, nalambigit sa illegal numbers game sama sa illegal swertres nga hugot nga gireklamo sa Philippine Charity Sweepstakes Office (PCSO) diin ang ilang autho­rized agent sa probinsya sa Sugbo ang bugtong gihatagan nila og permit to operate.

ARMAS

Subay sa hugot nga pagpa­ngandam sa nagsingabot nga midterm election sa sunod tuig, ang kapulisan nipakusog pa sa ilang kampanya batok sa loose firearms.

Sulod sa duha ka adlaw nga dungan nga operasyon, nakaimbargo sila’g 86 ka mga armas nga way lisensya ug ang uban niini gi-turnover sa mga naghupot niini.

Nakasikop usab sila og walo ka mga tawo nga ila na usab nga napasaka ang kasong illegal possession of firearms.

Gitinguha sa kapulisan sa Central Visayas nga mapug­ngan ang pagkatap sa mga armas nga walay lisensya kay basin magamit kini sa nagsi­ngabot nga midterm elections.

WANTED PERSONS

Nakadakop usab ang kapulisan og 90 ka mga wan­ted person nga dunay mga pending warrant of arrest sa nagkalainlaing kaso nga giatubang niini diin tulo niini giila nga mga most wanted person sa Central Visayas. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph