P4.7M balor sa drugas sakmit; bodegero sikop

BUY-BUST: Giila sa kapulisan nga bodegero sa gidiling drugas nasikop sa buy-bust sa Saint Jude Acres, Barangay Bulacao, dakbayan sa Sugbo, alas 10:30 sa gabii, Dominggo,  Mayo 12, 2024. / Regional Police Drug Enforcement Unit 7
BUY-BUST: Giila sa kapulisan nga bodegero sa gidiling drugas nasikop sa buy-bust sa Saint Jude Acres, Barangay Bulacao, dakbayan sa Sugbo, alas 10:30 sa gabii, Dominggo, Mayo 12, 2024. / Regional Police Drug Enforcement Unit 7

Giila sa kapulisan nga bodegero sa gidiling drugas ug nagsilbi usab nga tighatod niini nasikop sa buy-bust sa Regional Police Drug Enforcement Unit (RPDEU 7) sa Saint Jude Acres, Barangay Bulacao, dakbayan sa Sugbo sa alas 10:30 sa gabii sa Dominggo, Mayo 12, 2024.

Ang suspek nga napusasan human nakatunol sa mga binulto sa gituohang shabu giila nga si Ronilito Supat, 38, taga Sitio Riverside, Brgy. Bulacao, siyudad sa Sugbo.

Nakuha gikan kaniya ang dagkung mga putos sa gituohang shabu nga motimbang ang tanan og 700 gramos nga dunay standard drug price nga P4,760,000.

Sa imbestigasyon sa kapu­lisan nasuta nga gikan sa Cebu City Jail ang kontak ni Supat nga maoy momando kaniya labot sa pag-abot sa supply sa shabu.

Inig abot sa butang, siya usab ang mohatod niini sa kustomer base sa mando sa iyang kontak nga usa ka drug personality nga naa sa sulod sa bilanggoan.

Giingong tibuok dakbayan sa Sugbo ang area sa distribution niini sa ilegal nga drugas diin duna na siya’y gipangtug-an atol sa imbestigasyon kinsa ang hatdanan niya sa supply.

Si Supat gipaubos na sa kapulisan sa monitoring sulod sa usa ka buwan ug human nakompirmar gilusad dayon ang anti-illegal drug operation. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph