P4B nang kadaut sa mga sunog sa 2023

SUNOG: Ang pagkasunog sa Grand Residences condominium maoy mipaburot og maayo sa gidak-on sa danyos sa mga sunog sa dakbayan sa Sugbo sa tuig 2023.
SUNOG: Ang pagkasunog sa Grand Residences condominium maoy mipaburot og maayo sa gidak-on sa danyos sa mga sunog sa dakbayan sa Sugbo sa tuig 2023. file

Mga duha ka semana sa dili pa matapos ang tuig 2023, nilabaw na sa P4 bilyunes ang kantidad sa danyos sa mga kabtangan nga namugna sa sunog sa Cebu City.

Ang information officer sa Cebu City Fire Office nga si SFO2 Wendell Villanueva niingon nga ang maong ihap nagrepresentar sa dako kaayong kalainan gikan sa P516 milyunes nga kantidad sa mga kabtangan nga naugdaw sa sunog sa miaging tuig.

Ang maong ihap 718 porsiyento nga pagtaas gikan sa kadaot nga natala gikan sa mga insidente nga narekord sa siyudad gikan sa Enero hangtod sa Disyembre 2022, matod ni Villanueva.

Matod ni Villanueva nga niadtong Martes, Disyembre 11, ang kabomberuhan sa dakbayan nakatala na og danyos sa mga kabtangan nga gibana-bana nga P4,091,223,150, human sa pagtubag sa 305 ka insidente sa sunog karong tuiga, nga mas taas usab sa 231 ka insidente nga natala niadtong 2022.

Matod ni Villanueva nga dakong bahin sa pagkaguba sa kabtangan nahitabo atol sa sunog nga nahitabo sa wala pa nahuman nga high-rise building sa Barangay Kasambagan, dakbayan sa Sugbo, niadtong Abril.

Mokabat sa P4 bilyunes ang danyos sa sunog nga miulbo sa 35-storey nga Grand Residences condominium.

Nagsugod ang sunog mga alas 2:40 sa hapon ug nisaka ngadto sa Task Force Bravo duha lang ka oras ang milabay sa alas 4:38 sa hapon, hinungdan sa pagresponde sa tanang kabomberuhan sa Sugbo.

Gideklarar sa kabomberuhan nga napalong ang kayo alas 11:50 sa gabii, nga mitapos sa siyam ka oras nga operasyon.

Si Villanueva niingon nga ang ihap sa nangamatay sa mga insidente sa sunog misaka usab ngadto sa walo karong tuiga kon itandi sa usa ka kinabuhi nga nakalas niadtong 2022.

Sa kinatibuk-an, 21 ka mga indibidwal ang gikataho nga nasamdan hangtod karon nga tuig; samtang sa miaging tuig, 27 ka tawo ang nasamdan.

Si Villanueva niingon nga ang nag-unang hinungdan sa sunog karong tuiga giila nga electrical misuse, tungod kay pipila ka mga tag-iya sa balay nagpanuko sa pagsulbad sa mga isyo nga may kalabutan sa ilang electrical installations.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph