MOABOT sa P50.1 milyones nga balor sa ilegal nga drogas ang nasakmit sa Police Regional Office (PRO 7) sulod sa 12 ka adlaw nga simultaneous anti-criminality and law enforcement operation (Sacleo) nga gilusad gikan sa Abril 30 hangtod Mayo 12, 2025, nga mao ang adlaw sa eleksyon.
Gituyo sa kapulisan sa Central Visayas ang paglusad og subsub nga Sacleo aron pagsiguro nga mahimong hapsay ug malinawon ang national and local election karong tuiga.
Sa datus sa PRO 7, nakasakmit ang kapulisan sa tibuok rehiyon og 8,848.19 ka gramos nga gituohang shabu nga dunay standard drug price nga P50,167,692 ug pito ka gramos nga dahon sa marijuana.
Sa gilusad nga 204 ka anti-illegal drug operations, 251 ka mga suspetsado ang nasikop sa kapulisan.
Gawas sa ilegal nga drugas, nakasikop usab ang PRO 7 og 160 ka mga wanted persons, lakip na niini ang 23 ka tawo nga giila nga mga most wanted persons sa rehiyon.
Wala usab sila molugak sa ilang kampanya batok sa loose firearms diin ilang nasakmit ang 75 ka dili lisensyado nga lain-laing kalibre sa armas, usa ka granada, ug 208 ka mga bala.
Gipakusgan pa nila ang checkpoint operations, patrol deployments, ug intelligence-based interventions nga nakatabang sa pagpugong sa election-related incidents ug uban pa nga hulga sa eleksyon.
Tungod niini, nahimong malampuson ang kapulisan sa pagpatuman sa kahusay ug kalinaw sa tibuok election period.
Wala makatala ang kapulisan sa Central Visayas og major election-related incidents, kini tungod sa epektibo nga pagpatuman sa security plan ug ang inter-agency nga pag-alayon sa mga tinugyanan sa balaod.
Midayeg si Police Brigadier General Redrico Maranan, hepe sa PRO 7, sa iyang mga personnel tungod sa walay hunong nga pagpakigbatok sa krimen. / AYB