Nakasakmit ang Police Regional Office (PRO) 7 og kapin sa pito ka kilo sa gituohang shabu nga ang tanan mobalor sa P50.6 milyunes ug upat ka gramo nga marijuana nga niresulta sa pagkasikop sa 133 ka drug suspects sulod sa usa ka semana nga anti-criminality operation lukop Central Visayas nga nagsugod niadtong Mayo 18, 2025, ug natapos sa Mayo 24, 2025.
Sa ilang gilusad nga 115 ka anti-criminality operations, 259 ka tawo ang mga nadakpan sa paghimo og lainlaing krimen, lakip na niini ang 133 ka drug suspects.
Gawas sa ilegal nga drugas, gipakusgan sab sa PRO 7 ang ilang kampanya batok loose firearms diin nakakumpiska sila og 29 ka armas nga walay lisensya, 2 ka explosives, ug 223 ka bala sa nagkalainlaing kalibre sa armas ug nakasikop og 18 ka mga tawo nga naghupot niini.
Gipasakahan na og kasong kalapasan sa Republic Act 10591 kon Illegal Possession of Firearms and Explosives ang mga dinakpan.
Samtang moabot sab sa 76 ka wanted persons ang nadakpan pinasikad sa mga warrant of arrest nga giluwatan sa korte may labot sa mga kaso nga ilang giatubang.
Si PRO 7 Director Police Brigadier General Redrico Maranan nidayeg sa iyang mga sakop tungod sa ilang gipakitang dedikasyon sa trabaho.
“These achievements are the result of relentless efforts and intelligence-driven operations by our men and women in uniform. The safety and security of our communities remain our top priority,” matod ni Maranan.
Giawhag sa kapulisan ang publiko nga padayon nga makig-alayon sa mga tinugyanan sa balaod pinaagi sa pag-report kon dunay kadudahan'g tawo nga masigpatan sa ilang palibot. / AYB