Kapin sa P50,000 ang kinatibuk-ang ganti sa 2024 Cebu Press Freedom Week (CPFW) Fun Run nga gikatakda karong Septiyembre 14, 2024, sa Robinsons Galleria Cebu.
Gi-organisar sa Cebu Federation of Beat Journalists (CFBJ), ang fund-raising footrace adunay tulo ka mga kategoriya nga mao ang 10-kilometer, 5K ug 3K (men/women).
Ang top three finishers sa 10K makadawat og P7,000, P4,000 ug P2,500.
Sa 5K, ang top three winners makabulsa og P5,000, P3,000, ug P1,500 samtang P3,000, P2,000 ug P1,000 sa 3K.
Ang mag-unang 200 finishers sa matag kategoriya hatagan og finisher’s medal.
Aduna’y kahigayunan ang mga partisipante nga makadagan kauban sa inilang Cebu media personalities gumikan kay adunay gilakip nga eksklusibong 3K category alang sa journalists sa print, radio, ug television.
Aduna sab raffle prizes nga idalit sa Racetech ni Precing “Coach P” Capangpangan, kinsa usa ka beteranong race director.
Ang bayad sa rehistrasyon nagbalor og P800 sa 10K, P700 sa P5K, ug P550 sa 3K lakip na niini ang singlets.
Padayon pa ang rehistrasyon sa CFBJ Facebook page, radio station dyHP sa dalan Escario ug Manila Bulletin-Cebu office sa dalan Jakosalem ning Dakbayan sa Sugbo. / ESL