Bisan kutob na lang sa Hunyo 30, 2025, si Cebu City Mayor Raymond Alvin Garcia, nipasalig siya sa Cebu City Police Office (CCPO) nga mapadayon ang pagtukod sa P50 milyunes nga balor sa ilang building.
Matod sa mayor nga bisan og bag-o na ang mayor sa Hunyo 30, padayon nga matukod ang upat ka andana nga building sa sulod sa Camp Sotero Cabahug sa dalan Gorordo, Barangay Hipodromo tungod kay naa na kini notice to proceed ug duna nay budget alang niini lakip na ang winning contractor.
Dili lang kini mahinayon kon ang bag-ong administrasyon mo-cancel sa kontrata ug uban pa apan mamahimong mag-atubang sila og kaso.
“Once you bid the project, you award it and then there is notice to proceed it means naa nay budget, sakto na ang bidding process naa nay works and estimates,” matod ni Garcia.
Gisaad sa mayor nga iyang monitoron ang pagtukod sa building gumikan kay nagsugod kini sa iyang administrasyon.
Niadtong Pebrero 26, 2025, gipahigayon ang groundbreaking ug gibanabana nga masugdan dayon ang pagtukod niini. / AYB