P50M gigahin sa dakbayan sa Mandaue para sa MCC

Naggahin ang Dakbayan sa Mandaue og P50 milyunes para sa unang hugna sa pagtukod og bag-ong building para sa Mandaue City College (MCC), nga gikatakda nga magsugod sunod tuig sa Barangay Looc aron matubag ang nagkadako nga populasyon sa mga estudyante.

Kini nga pundo apil sa tinuig nga alokasyon sa dakbayan diin ang konstruksyon gikatakda nga magsugod human malukad ang mga binilanggo nga mga babaye gikan sa daang pasilidad sa Mandaue Bureau of Jail Management and Penology (BJMP).

Ang male dormitory na-relocate na ngadto sa bag-ong pasilidad sa Dungguan, Barangay Basak, niadtong Setyembre 24, 2023, samtang ang mga binilanggo nga mga babaye gipaabot pa nga malukad hangtod nga makumpleto ang ilang bag-ong pasilidad.

Kung mahuman na ang paglalin, magsugod ang demolisyon sa daang jail facility aron maghimo og dalan para sa bag-ong building sa kolehiyo.

Sumala sa inisyal nga plano sa dakbayan, ang bag-ong building magatubo og lima ka andana, nga adunay 77 ka mga kwarto.

Ang daang estruktura sa Mandaue City College usa lang ka single-level nga building nga adunay mga 20 ka kwarto. / CAV