Kapin sa P50 milyunes nga balor sa ilegal nga drugas ang nasakmit sa Cebu Police Provincial Office (CPPO) sulod sa lima ka buwan nga subsob nga anti-drug operations gikan sa Enero 12 ngadto sa Hunyo 8, 2025.
Nakalusad ang kapulisan sa Probinsiya sa Sugbo og 850 ka anti-illegal drug operations nga niresulta sa pagkasikop sa 1,221 ka drug suspects ug pagkasakmit sa 7,350.945 gramos nga shabu nga dunay standard drug price nga P49,986,426 ug 306 gramos sa pinaugang dahon sa marijuana ug 700 ka punoan sa marijuana nga dunay street value nga P176,720.
Subay niini, ang CPPO nakapasaka na og kaso sa korte batok sa 1,962 ka drug suspects nga nangadakpan lakip na kadtong nakaikyas sa operation.
Si Police Colonel Jovito Atanacio ang hepe sa CPPO namahayag nga ang pagkasakmit sa maong gidaghanon sa ilegal nga drugas ug pagkasikop sa mga nalambigit nagpakita kon unsa sila ka sinsiro sa ilang paggukod sa mga durugista.
Matod niya nga daghang kinabuhi ang mausik kon napasagdan nga nakaabot sa kadalanan ang maong gidaghanon sa ilegal nga drugas.
“This is a clear and resounding message to all those who profit from destroying lives through illegal drugs: We will find you, we will stop you, and we will make you accountable. Every operation we conduct is a step closer to safer communities and a future free from the grip of addiction,” matod ni Atanacio.
Ubos sa pagdumala ni Atanacio sa CPPO, gipalig-on niya ang pakig-alayon sa kabarangayan, intelligence unit ug ubang ahensiya sa nasudnong kagamhanan aron pagpatuman sa targeted ug intelligence driven operations pagbungkag sa drug network sa tibuok Lalawigan sa Sugbo.
Padayon nga niawhag ang CPPO sa publiko nga tabangan sila sa ilang kampanya pinaagi sa pag taho sa mga kadudahang kalihukan sa ilang tagsa-tagsa ka lugar aron pagbatok sa ilegal nga drugas. / AYB