P570M nga shabu nasakmit sa CV sud sa 3 ka buwan

Central Visayas
Central VisayasFile

Moabot na ngadto sa P570.7 milyunes nga balor sa ilegal nga drugas nasakmit sa Philippine Drug Enforcement Agency 7 gikan sa Enero 1, 2024 hangtod sa Abril 28, 2024.

Sa datus nga gipahibawo ni Leia Alcantara, information officer sa PDEA-7, nga nakasakmit na sila og 83.88 ka kilo sa shabu, 5.95 gramos sa pinauga nga dahon sa marijuana, 12,540 ka punoan sa marijuana, 205 ka ampoules sa nalbuphine hydrochloride nga mokantidad ang tanan og P570,734,189.

Moabot na usab sa 19 ka mga drug den ang malampuson nga nabungkag sa PDEA-7 sa tibuok Central Visayas, 12 niini nahimutang sa dakbayan sa Sugbo.

Nipasabot si Alcantara nganong naa sa dakbayan sa Sugbo ang labing daghang drug den tungod kay naa man usab dinhi kasagaran ang supply ug tungod sa kadaghan sa nagsikitsikit nga mga balay.

Naa usab ang mga dayo gikan sa lainlaing lugar sa Central Visayas ilabi na kadtong mga nanarbaho.

“Ang Cebu City man gud dense kaayo og population. Naay mga dayo diri expected siya basta daghan og tawo, daghan sad og drug dens,” matod ni Alcantara.

Iyang gipasabot nga nakatutok sila sa pagbungkag sa mga drug den sanglit giila nila kini nga high impact operations.

Diha, matod pa, ang breeding ground sa criminality tungod kay kon mapasagdan ni daghan ang mogamit sa ilegal nga drugas ug sa kadugayan daghang krimen ang mahitabo.

Dugang ni Alcantara nga kon adunay drug den ang usa ka barangay, mosaka usab ang krimen niini.

Ang uwahing drug den nga gibungkag sa PDEA 7 nahimutang sa Barrio Wakwak, Barangay Suba,dakbayan sa Sugbo diin ang magtiayon nga taga Barangay Apas naabtan sa mga operatiba nga nanuyop.

Ang magtiayon adunay unom ka mga anak, diin ang kamaguwangan nagpangidaron pa og 14.

Tungod niini, gibutyag ni Alcantara nga dako kaayo og tabang kon mabungkag ang usa ka drug den tungod kay daghang pamilya ang maguba tungod sa paggamit sa ilegal nga drugas. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph