Mipadayag og kabalaka ang Konseho sa Dakbayan sa Sugbo kabahin sa P593,300 nga purchase order (PO) para sa usa ka buffet nga adunay duha ka snacks alang sa Cebu City Cooperative Development Council (CCDC)
Atol sa regular session niadtong Miyerkules, Hunyo 4, 2025, ang konsehal ug mayor-elect nga si Nestor Archival misukna sa usa ka resolusyon nga gisugyot ni Konsehal Edgardo “Jaypee” Labella nga nagtinguha nga singilon ang kagamhanan sa siyudad sa kinatibuk-ang kantidad nga P988,300, nga naglakip sa pagkaon ug venue alang sa Cooperative Summit ug year-end assessment.
Si Konsehal Pancrasio Esparis maoy nagpresentar sa resolusyon alang kang Labella.
Si Archival nangutana kon restaurant ba gyud kining Cebu Best Value Trading, nga maoy mo-supply sa mga pagkaon.
“Kaning Cebu Best Value Trading, trading man ni, restaurant diay ni?” pangutana ni Archival.
Si Konsehal Rey Gealon mipasabot nga bisan pa sa “trading” nga ngalan niini, ang supplier makahatag gyud og pagkaon alang sa Cooperative Development Assemblies.
“On the supplier’s name that it is trading, perhaps the business is fashioned under the name of trading, nonetheless it provided for the buffet or food for the participants of these assemblies,” pagpasabot ni Gealon.
Apan si Konsehal Joy Augustus Young nangayu og katin-awan sa maong isyu.
Nahinumdom siya sa nangaging mga higayon diin ang mga food supplier alang sa mga kalihokan sa siyudad nakaplagan nga dili kwalipikado.
“In the past years ang madunggan nako permi diha ang mga supplier dili qualified. Tan-awon nimo nga asa ang opisina, walay opisina. Tua sa Manila, nya’g adtuon nila walay opisina sa Manila,” sugid ni Young.
Dugang pa niyang gikutlo ang usa ka lokal nga ehemplo: “Nya gibidding diri local duha kabuok iyang opisina usa siya ka stall diha sa Carbon, namaligya’g karne.”
Gipasiugda ni Young nga ang ingon ani nga mga sitwasyon natural nga makapabalaka sa mga konsehal, ilabina kang Archival.
“We should investigate this kung unsa ni inyong supplier kung qualified ba or dili. Wala man ta’y kaso kung si kinsa’y mo-supply, pero ang problema diha bisan kinsa la’y mo-supply dira nga dili qualified. Mamakak lang ba,” matod ni Young.
Si Konsehal Jose Lorenzo Abellanosa mipatugbaw usab sa kabalaka bahin sa pagkawala sa invoice sa resolusyon.
Agig tubag, si Konsehal Jocelyn Pesquera, kinsa nagsilbing acting presiding officer sa session, mipahayag nga sa iyang online check, ang Cebu Best Value Trading namalit usab og pagkaon alang sa Kagamhanan sa Probinsya sa Sugbo.
Iyang gipasabot nga ang Department of Trade and Industry (DTI) nagtugot sa mga negosyo nga mogamit og “trading” sa ilang ngalan bisan pa kung naghatag sila og ubang serbisyo.
Tungod sa mga diskusyon ug mga kabalaka nga gipatugbaw, si Esparis milihok alang sa paglangan sa resolusyon, nga nagpugong sa pag-aprobar niini alang sa dugang nga klaripikasyon ug beripikasyon. / JPS