P.5M nga drugas nasakmit gikan sa HVI

Naposasan ang usa ka 44 anyos nga lalaki nga giila nga high value individual (HVI) human masikop sa buy-bust sa Mabolo Police Station 4 sa Cebu City Police Office (CCPO), alas 9:20 sa gabii, Miyerkules, Septiyembre 4, 2024, sa Sitio Malinaw, Barangay Carreta sa dakbayan sa Sugbo.

Ang suspetsado mao si Rogelio Magbanus, 44, residente sa naasoy nga lugar, nakuhaan og mga pinakete sa gituohang shabu nga motimbang sa 75 gramos nga dunay standard drug price nga P511,360.

Matod ni Police Major Romeo Caacoy Jr., hepe sa Mabolo Police Station, nga samtang nagpatrolya ang iyang personnel, naaktohan nila ang suspek nga namaligya kini'g ilegal nga drugas sa iyang kustomer.

Dali nga nakadagan ang gibaligyaan apan nagunitan nila ang suspek nga si Magbanus.

Nibutyag si Caacoy nga nadakpan na kaniadto ang suspek sa kaso gihapon sa ilegal nga drugas ug nalambigit usab kini sa pagpangawat sa maong dapit.

"Ilado siya kay kaso ni siya sauna, so, mao lagi na kung maka bargain ang uban mobalik lang pud gihapon," matod ni Caacoy.

Kalapasan sa Section 11, Acticle II sa Republic Act 9165 o Comprehensive Dangerous Drugs Act of 2002 ang atubangon nga kaso sa suspek. / AYB