P68M nga shabu gikan sa Luzon

P68M nga shabu gikan sa Luzon
SunStar Local News GPX

Moabot ngadto sa P68 milyunes nga balor sa ilegal nga drugas ang nasakmit sa mga sakop sa Regional Police Drug Enforcement Unit 7 atol sa buy-bust operation alas 9 sa Lunes sa gabii, Disyembre 11, 2023, sa President Roxas St., Villa Aurora, Brgy. Kasambagan, dakbayan sa Sugbo.

Ang suspek giila sa mga saksi nga si Harvey Torres, 30, taga San Cristobal, San Pablo, Laguna apan kasamtangan nga nag-abang sa usa ka condominium sa barangay.

Napulo ka dagkong mga putos sa gituohang shabu nasakmit sa mga operatiba. Matag usa sa putos motimbang og tag usa ka kilo sa gituohang shabu.

Ang matag kilo dunay street drug price (SDP) nga P6.8 milyunes. Usa sa mga operatiba sa RPDEU-7 nga dili lang magpaila nitug-an sa Superbalita Cebu nga unang nigawas ang ngalan ni Torres nga maoy magdala’g daghang supply sa ilegal nga drugas sa dakbayan sa Sugbo.

Kompleto ang gihatag nga impormasyon sa maong drug personality kon unsang adlawa moabot si Torres ug magdala og daghang supply gikan sa Luzon.

Tuod man, nahibaw-an dayon ang pag-abot sa suspek dinhi sa dakbayan sa Sugbo ug gi-transact usab siya sa mga polis nga ningpailang kustomer.

Dali nga nisanong si Torres ug niuyon nga mohatag og daghang supply.

Atol sa buy-bust, gipusasan dayon siya ug gipahibawo nga polis ang iyang gikasabot.

BACKGROUND

Sa background investigation sa kapulisan, nasuta nga nabilanggo na sa kasong ilegal nga drugas si Torres niadtong Hunyo 2022, apan nakagawas tungod sa plea bargaining niadtong Nobiyembre 2022.

Nibalik sa iyang naandan nga trabaho nga mao ang tighatod sa ilegal nga drugas sa bisan asa nga lugar sa Pilipinas bugti sa P30,000 nga suhol ug laing P20,000 kon mahurot niya og dispose.

Gi-landtrip lang, matod pa, sa suspek ang maong gidaghanon sa ilegal nga drugas pinaagi sa pagsulod niini sa travelling bag ug gisakay sa bus gikan sa Metro Manila paingon sa Sugbo.

Gibutyag ni Torres nga wala ra susiha ang iyang bag nga gisudlan sa 10 kilos nga shabu gikan sa kaulohan paingon sa Sugbo.

Makatulo na kini ka higayon nga siya nakadala og daghang supply sa ilegal nga drugas sa Sugbo. Ang una niadtong Marso 2023 diin iyang gibana-bana nga moabot sa lima ka kilos ang iyang na dispose.

Nibalik siya niadtong Hulyo 2023 nga sa iyang bana-bana sa gibug-aton moabot og 7 kilos ug ang ang katapusan mao ang 10 kilos.

Si Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa Police Regional Office 7, nibutyag nga alang sa holiday season ang maong supply.

Namonitor na ang lihok sa suspek sa wala pa siya niabot sa Central Visayas hinungdan nga nakuha gyud nila kini.

Duna nay gibutyag si Torres kinsa ang iyang local contacts nga maoy downline niini sa pagpayuhot sa ilegal nga drugas, lakip na kon kinsa ang momando kaniya sa ibabaw.

“Naa tay mga ongoing nga operation kay sa custodial debriefing naa man syay gipang mention,” matod ni Pelare.

Ang maong gidaghanon sa ilegal nga drugas, pasabot ni Pelare, dunay alang sa probinsya sa Sugbo ug mga silingang lalawigan sa Central Visayas.

Dako og epekto sa supply sa ilegal nga drugas ang pagkasakmit niini. Si Police Lieutenant Janette Rafter, deputy city director for operations sa Cebu City Police Office, nibutyag nga dako unta og kadaot sa mga batan-on kon nakaabot pa sa gawas ang maong drugas.

“Dako gyud kaayo to nga kalampusan sa atong kapulisan. Dili nato ma imagine nga ingon niadto kadako ang maabot sa lain-laing lugar sa Sugbo labi na nga naa tay mga kalingawan,” matod ni Rafter.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph