Usa ka 34 anyos nga lalaki nga nabutang sa listahan isip high value individual (HVI) sa kapulisan sa Lalawigan sa Bohol ang nadakpan sa buy-bust sa mga sakop sa Provincial Intelligence Unit sa Bohol Police Provincial Office alas 8:25 sa gabii, Lunes, Mayo 19, 2025, sa Purok 2, Barangay Tiptip, Dakbayan sa Tagbilaran.
Ang suspek giila nga si Christopher Rey Agcol, 34, taga Purok 3, Barangay Bugang Norte, Lungsod sa Bilar apan kasamtangan nga nagpuyo sa Barangay Dampas, Dakbayan sa Tagbilaran.
Nakuha gikan kaniya ang walo ka dagkong putos ug laing upat ka gagmay nga putos sa gituohang shabu nga gisulod sa Chinese tea packs nga adunay gibug-aton nga 1,020 gramos or balor nga P6,936,000, og cellular phone.
Matod sa usa sa mga operatiba nga nabutang sa PNP target list ang maong suspek isip high value individual diin ang contact niini anaa sulod sa bilanggoan sa Leyte.
Halos duha ka bulan nga gimonitor sa kapulisan ang maong suspek human nitumaw ang iyang pangalan isip usa ka drug personality.
Giingong makabaligya si Angcol og 300 gramos nga shabu matag semana.
Ang iyang area of distribution mao ang Dakbayan sa Tagbilaran ug tibuok 1st District ug pipila ka lungsod sa 3rd district sa Lalawigan sa Bohol.
Ang mga nakuha nga ebidensya giduso na sa Provincial Forensic Unit sa Bohol Police Provincial Office alang sa chemical analysis.
Kasong kalapasan sa Section 5 ug 11, Article II, sa Republic Act 9165 kon Comprehensive Dangerous Drugs Act of 2002 ang atubangon sa maong suspek. / AYB